اۋە جۇكتەرىن وڭدەۋ كولەمى جىلىنا 300 مىڭ تونناعا جەتكىزىلەدى
استانا. KAZINFORM - قازاقستان اۋە جۇكتەرىن وڭدەۋ كولەمىن جىلىنا 300 مىڭ تونناعا جەتكىزبەك. بۇل تۋرالى كولىك ۆيتسە-ءمينيسترى ماقسات قالياقباروۆ ايتتى.
«اۋەجايلار قازاقستاننىڭ كولىك جۇيەسىنىڭ ماڭىزدى بولىگى سانالادى. ءبىزدىڭ باستى مىندەتتەرىمىزدىڭ ءبىرى - ولارعا ارناۋلى ەكونوميكالىق ايماق مارتەبەسىن بەرە وتىرىپ، اەروحابقا اينالدىرۋ جانە الداعى ءتورت جىلدا قازاقستانداعى اۋە جۇكتەرىن وڭدەۋ كولەمىن جىلىنا 300 مىڭ تونناعا دەيىن ەكى ەسەگە ارتتىرۋ. بۇل ماقساتقا جەتۋ ءۇشىن اۋەجايلارىمىزدىڭ جۇك تاسىمالداۋ مۇمكىندىكتەرىن ايتارلىقتاي كەڭەيتۋ قاجەت»، - دەدى ول ەلوردادا وتكەن قازاقستان- نيدەرلاندى ءبىرىنشى ىسكەرلىك كەڭەسىندە.
ۆيتسە-مينيستر قازاقستان ءۇشىن تاعى ءبىر ستراتەگيالىق باعىت - اۆتوموبيل جولدارىن سالۋ جانە جاڭعىرتۋ ەكەندىگىنە توقتالدى.
«ساپالى جول جۇيەسىن دامىتۋ وڭىرلەر اراسىنداعى ءتيىمدى بايلانىستى قامتاماسىز ەتەدى. جۇكتەردىڭ قوزعالىسىن جىلدامداتادى جانە كولىكتىڭ قولجەتىمدىلىگىن جاقسارتادى. ءبىز بۇل سالانى ينۆەستيتسيا تارتۋدىڭ نەگىزگى سەكتورلارىنىڭ ءبىرى رەتىندە قاراستىرامىز»، - دەدى ماقسات قالياقباروۆ.
بۇعان دەيىن ەلىمىز 2030-جىلعا قاراي كونتەينەرلىك جۇك تاسىمالىن 10 ميلليون تونناعا جەتكىزۋدى جوسپارلاپ وتىرعانىن جازعان ەدىك.
