اۋە بازالارىن زىمىرانمەن اتقىلاعان: پاكىستان «جاۋاپ قايتارۋعا» ۋادە بەردى

استانا. KAZINFORM - پاكىستان ءۇندىستاندى زىمىران شابۋىلىن جاسادى دەپ ايىپتادى. BBC اگەنتتىگىنىڭ حابارلاۋىنشا، ءۇندىستاننىڭ اۋە كۇشتەرى شەكارا باعىتىنا التى بالليستيكالىق زىمىران ۇشىرعان.

Reuters اگەنتتىگىنىڭ مالىمەتىنشە، پاكىستان ارمياسىنىڭ رەسمي وكىلى احمەد شاريف چاۋدريدىڭ ايتۋىنشا، زىمىراندار ءۇندىستاننىڭ ادامپۋر قالاسىنان ۇشىرىلعان. ولار پاكىستان اۋماعىنداعى بىرنەشە اۋە بازالاردى، سونىڭ ىشىندە يسلاماباد قالاسىنان 10 شاقىرىم جەردەگى راۆالپيندي قالاسىندا ورنالاسقان نۋر حان بازاسىن نىساناعا العان. چاۋدريدىڭ مالىمدەۋىنشە، پاكىستاننىڭ اۋە كۇشتەرىنە تيەسىلى نىساندارعا زيان كەلمەگەن.

ونىڭ ايتۋىنشا، التى زىمىراننىڭ بەسەۋى ءۇندىستان اۋماعىندا، پەندجاب شتاتىندا اتىپ تۇسىرىلگەن.

- ءۇندىستان ەندى ءبىزدىڭ جاۋابىمىزدى كۇتۋى ءتيىس، - دەگەن چاۋدريدىڭ ءسوزىن Reuters اگەنتتىگى كەلتىرەدى.

ءۇندىستان ازىرگە بۇل ايىپتاۋلارعا قاتىستى رەسمي تۇسىنىكتەمە بەرگەن جوق.

بۇعان دەيىن ءۇندىستان مەن پاكىستان كاشمير ايماعىندا ءبىر-بىرىنە تاعى دا وق جاۋدىرعان بولاتىن.

پاكىستان قورعانىس ءمينيسترى ەكى ەل اراسىنداعى شيەلەنىستىڭ ءورشۋى يادرولىق سوعىسقا اكەلۋى مۇمكىن ەكەنىن ەسكەرتكەن بولاتىن.

سونداي-اق، بۇعان دەيىن Air Astana اۋە كومپانياسى الماتى - دەلي باعىتىنداعى رەيستىڭ ۇشپايتىنىن حابارلاعان ەدى. كەيىننەن ءۇندىستانعا قاتىنايتىن ءبىرقاتار ۇشاقتاردىڭ كەستەسىنە وزگەرىس ەنگەن بولاتىن.