اڭ، بالىق اۋلاۋدا قانداي قاۋىپسىزدىك شارالارى بار
دەمالىستىڭ ءساتى تۇسكەندە بالىق اۋلاۋدى ادەتكە اينالدىرعان ەر ازاماتتار از ەمەس. ولارعا جىلدىڭ قاي مەزگىلىندە دە وزەن-كول جاعاسىندا بالىق اۋلاۋ - عانيبەت. اڭ اۋلاۋ ماۋسىمىن دا كۇتىپ جۇرەتىندەر بارشىلىق. وسى رەتتە جەكە باس قاۋىپسىزدىگى شارالارىنا نازار اۋدارعان ارتىق بولمايدى. Kazinform بۇل ورايدا قىزىلوردا وبلىسى جالاعاش اۋدانى توتەنشە جاعدايلار ءبولىمىنىڭ باستىعى ەركىن نازارقۇلوۆتى اڭگىمەگە تارتقان ەدى.
- بالىق اۋلاۋعا شىققاندا توسىن جاعدايعا ۇرىنباۋ ءۇشىن قانداي ساقتىق شارالارىنا نازار اۋدارعان ءجون؟
- كولدىڭ نەمەسە وزەننىڭ جاعالاۋىندا بالىق اۋلاۋعا كىرىسەر الدىندا تاڭدالعان جەردى مۇقيات قاراپ شىققان ارتىق ەمەس. ايدىننىڭ قاۋىپسىزدىك دارەجەسى انىقتالۋى قاجەت. الدىمەن، جاعادان ۇشكىر تاستاردى، تىكەنەكتى بۇتاقتاردى جانە باسقا دا قاۋىپ كەلتىرۋى مۇمكىن زاتتاردى الىپ تاستاعان ابزال. سودان كەيىن بالىق اۋلاۋعا ارنالعان قۇرالداردى ورىن-ورنىنا قويىپ، قارماقپەن بالىق اۋلاعاندا كەدەرگى كەلتىرمەيتىنىنە كوز جەتكىزسە بولادى. قوپارىلعان جانە تىك جاعالاۋلاردا ەرەكشە ساقتىق قاجەت. سازدى جاعالاۋلار، اسىرەسە، جاڭبىردان كەيىن تايعاق بولادى. سول سەبەپتى سۋعا سىرعىپ كەتۋ قاۋپى بار.
- كولدىڭ نەمەسە وزەن ورتاسىندا قايىقپەن بالىق اۋلايتىندارعا قانداي كەڭەس بەرەر ەدىڭىز؟
- ەڭ باستىسى، وقىس جاعداي بولا قالسا، جۇزە ءبىلۋ قاجەت ەكەنىن ەستەن شىعارماعان ابزال. بۇل ءوز ءومىرىن ساقتاپ قالۋعا، ءتىپتى، ەڭ قيىن، كۇتپەگەن جاعدايدا قاسىنداعى ادامدى قۇتقارۋعا كومەكتەسەدى. سۋ ايدىنىنا شىعار الدىندا ازاماتتار قايىقتىڭ جاي- كۇيىن مۇقيات تەكسەرىپ، ەسكەكتىڭ اقاۋسىز ەكەنىنە كوز جەتكىزۋى قاجەت. بالىق اۋلاۋعا ارنالعان قۇرالداردى قايىقتىڭ جانىنا سالىپ قويعان ارتىق ەمەس. ال باسقا زاتتاردى (كيىمدى، سومكەنى، دوربانى) قايىقتىڭ الدىڭعى جاعىنا جانە ورىندىقتىڭ استىنا ورنالاستىرعان ءجون. مىندەتتى تۇردە قايىقتا قۇتقارۋ شەڭبەرى نەمەسە قۇتقارۋ كەۋدەشەسى، سۋ جيناۋعا ارنالعان شەلەك نەمەسە باسقا دا ىدىستار بولۋى ءتيىس.
- ال قىس ايلارىندا اڭشىلىق جاسايتىن تۇرعىندار نە ەسكەرۋى قاجەت؟
- اڭشىلىق تەك ارنايى رۇقسات قۇجاتى بار شارۋاشىلىقتاردىڭ اۋماعىندا جۇرگىزىلۋى ءتيىس. ءاربىر اڭشىنىڭ اڭ اۋلاۋ ەرەجەسىن، ءورت قاۋىپسىزدىگىن قاتاڭ ساقتاۋى كەرەكتىگىن ەسكە سالايىن. سۋدا جۇزەتىن قۇستار، سۋماڭى جانۋارلارىنىڭ وزگەشە مىنەز-قۇلىق تانىتۋى نەمەسە جاپپاي قىرىلۋى بايقالسا، بىردەن قورىق قىزمەتىنە، بولماسا اۋداندىق، وبلىستىق اڭشىلىق شارۋاشىلىعىنا شۇعىل تۇردە حابارلاۋ قاجەت. ويتكەنى قورشاعان ورتانى قورعاۋ - ءاربىر ازاماتتىڭ ازاماتتىق بورىشى.
اڭ اتۋعا رۇقسات قاعازدى اڭشىلىق شارۋاشىلىقتارى بەرەدى جانە وزگە شارۋاشىلىقتاردىڭ اۋماعىنا كىرۋگە نەمەسە مەرزىمى اياقتالعان جولدامامەن اڭشىلىققا شىعۋعا، قۇجاتتى وزگە تۇلعالارعا بەرۋگە تىيىم سالىنادى.
تاعى ءبىر ەسكەرە كەتەتىن جايت، تۇياقتى جانۋارلاردى اتۋعا شىققان كەزدە اڭشىلىق، شارۋاشىلىق قورىقشىسىمەن بىرگە ءجۇرۋ - مىندەتتى. اڭ اۋلاۋ ءتارتىبى تۋرالى اقپاراتتى اڭشىلار قوعامىنان جانە اڭشىلىق شارۋاشىلىقتارىنان الۋعا بولادى.
- اڭگىمەڭىزگە راقمەت.
اۆتور
ءادىلجان ۇمبەت
