استانا اۆتوبۋستارىندا جول اقىسى 9 جىلدان بەرى وزگەرگەن جوق - دەپۋتات

استانا. قازاقپارات - استانا قالالىق ءماسليحاتىنىڭ ءتوراعاسى ەرلان قاناليموۆ قوعامدىق كولىكتە ءجۇرۋ اقىسىن كوتەرۋ تۋرالى سۇراقتارعا جاۋاپ بەردى، دەپ حابارلايدى قازاقپارات ءتىلشىسى.

«جىل سوڭىنا دەيىن قوعامدىق كولىكتە جول ءجۇرۋ قۇنىن قىمباتتاتۋدى قاراستىرمايمىز. مۇمكىن كەلەسى جىلى قارالاتىن شىعار. مۇندا 90 تەڭگە جول ءجۇرۋ قۇنىن 9 جىل بويى ساقتاپ كەلە جاتقانىمىزدى تۇسىنۋلەرىڭىز كەرەك. وسى جىلدارى جانار-جاعارماي، بولشەكتەر، جابدىقتار قىمباتتاعانىنا قاراماستان قوعامدىق كولىكتە جول ءجۇرۋ قۇنى وزگەرگەن جوق. دەگەنمەن ازىرگە بۇل ماسەلەنى قاراستىرمايمىز»، - دەدى ەرلان قاناليموۆ ەلوردالىق كوممۋنيكاتسيا قىزمەتىندە وتكەن بريفينگتە.

سونىمەن بىرگە، دەپۋتات كەلەسى جىلى جول ءجۇرۋ اقىسى قىمباتتاۋى مۇمكىن ەكەنىن ايتتى.

«نارىقتىق جاعدايدى، نارىق كونيۋنكتۋراسىن، وسى سالانىڭ جاي- كۇيىن ەسكەرە وتىرىپ، مۇنى كەلەسى جىلدىڭ باسىندا قاراستىراتىن شىعارمىز، ءبىراق ازىرگە جول ءجۇرۋ قۇنىن ارتتىرۋ تۋرالى اڭگىمە جوق»، - دەدى سپيكەر.

ايتا كەتەيىك، الماتىدا قوعامدىق كولىكتە جول ءجۇرۋ قۇنى 20 تەڭگەگە ءوستى.

«وڭاي» كارتاسىمەن نەمەسە QR- كود ارقىلى تولەم جاساعاندا جول ءجۇرۋ اقىسى 100 تەڭگە، ال قولما-قول تولەمدە – 150 دەن 200 تەڭگەگە دەيىن كوتەرىلەدى.