قازاقستاننىڭ 9 وڭىرىندە اسكەري وقۋ- جاتتىعۋ وتۋدە
بۇل تۋرالى قازاقپارات قورعانىس مينيسترلىگىنە سىلتەمە جاساپ حابارلايدى.
بۇل وقۋ- جاتتىعۋ بيىلعى جىلدىڭ 16-ساۋىرىنە دەيىن جالعاسادى. قارۋلى كۇشتەردىڭ، ۇلتتىق قاۋىپسىزدىك كوميتەتىنىڭ، ىشكى ىستەر مينيسترلىگىنىڭ، توتەنشە جاعدايلار مينيسترلىگىنىڭ جانە جەرگىلىكتى اتقارۋشى ورگانداردىڭ داعدارىستى جاعدايدى بەيتاراپتاندىرۋ جونىندەگى بىرلەسكەن ءىس- قيمىلدارى پىسىقتالدى. وڭىرلەردە اسكەري بولىمشەلەر جاۋىنگەرلىك تەحنيكامەن بەلگىلەنگەن اۋداندارعا مارش جاساپ، وندا جوسپارلانعان تاپسىرمالاردى ورىندايدى. اتاپ ايتساق، بۇلار تەرروريزمگە قارسى وپەراتسيالاردى جۇرگىزۋ، مەملەكەتتىك شەكارانى قورعاۋدى كۇشەيتۋ، قوعامدىق قاۋىپسىزدىكتى قامتاماسىز ەتۋ، بوسقىندار لاگەرلەرىن اشۋ. ودان وزگە دە، قارۋلى كۇشتەردىڭ قۇرامالارى مەن بولىمدەرى پوليگونداردا ءتۇرلى جاۋىنگەرلىك ءىس- قيمىلدا، ونىڭ ىشىندە ارنايى وپەراتسيا بارىسىندا وقۋ- جاۋىنگەرلىك مىندەتتەردى پىسىقتايتىن بولادى.
«باتىل تويتارىس - 2022» ۆەدومستۆوارالىق كەشەندى ستراتەگيالىق كوماندالىق- شتابتىق وقۋ- جاتتىعۋى اقتوبە، الماتى، اتىراۋ، جامبىل، قىزىلوردا، ماڭعىستاۋ، تۇركىستان وبلىستارىنىڭ، سونداي- اق الماتى جانە شىمكەنت قالالارىنىڭ اۋماعىندا ءوتىپ جاتىر. شاراعا قارۋلى كۇشتەردىڭ، باسقا دا اسكەرلەر مەن اسكەري قۇرالىمداردىڭ قۇرامالارى مەن بولىمدەرى، ورتالىق مەملەكەتتىك جانە جەرگىلىكتى اتقارۋشى ورگاندارى جۇمىلدىرىلعان.
