قازاقستاندا قۇرىلىس سالۋشىلار 9 مىڭ ۇلەسكەردى الدادى
بۇل تۋرالى بۇگىن باس پروكۋراتۋرانىڭ القا ماجىلىسىندە قۇقىقتىق قورعاۋ دەپارتامەنتىنىڭ باسشىسى مارات سەكسەمبايەۆ ءمالىم ەتتى.
«بۇگىندە رەسپۋبليكانىڭ بەس وڭىرىندە 59 تۇيكىلدى نىسان بار، 9 مىڭ ادام الداندى. ولار مەملەكەتتەن كومەك سۇراپ، نارازىلىق اكسيالارىن وتكىزۋدە. وسى رەتتە قۇقىق قورعاۋ ورگاندارى تاعى دا تەرگەۋ شارالارىمەن اينالىسۋدا. بۇل وتە اۋقىمدى جۇمىس، ياعني مىڭداعان ادامداردان جاۋاپ الىپ، ونداعان ساراپتاما تاعايىنداۋ كەرەك. ءبىر ءۇيدىڭ نەمەسە كومپانيانىڭ ۇلەسكەرلەرى اراسىندا ءبىرىڭعاي پىكىر جوق بولعاندا قيىندىقتار تۋىندايدى. اتاپ ايتقاندا، بۇرىنعى قاتەلىكتەردەن ساباق الماي، ادامدار پاتەر ساتۋعا قۇقىعى جوق فيرمالارعا اقشالارىن اپارىپ بەردى»، - دەدى م. سەكسەمبايەۆ.
وسى رەتتە ول قۇرىلىسى اياقتالماعان نىساندارى مەن الدانعان ازاماتتارى كوپ استانا قالاسى ەكەنىن ءمالىم ەتتى. بۇل تۇرعىدا ەلوردادا 42 نىسان، 7 مىڭ ۇلەسكەر قامتىلعان. وسى كورسەتكىش ەلىمىز بويىنشا ۇلەسكەرلەر ماسەلەسىنىڭ 71 پايىزىن قۇرايدى.
