اتىس الاڭىندا ۇستازىن اتىپ ولتىرگەن 9 جاسار قىز سوتتالاما؟

استانا. قازاقپارات - امەريكالىق بيلىك اتىس جاتتىعۋى نۇسقاۋشىسىنا ابايسىزدا وق دارىتقان 9 جاسار قىز بالانى جازاعا تارتپايتىنىن مالىمدەدى.

39 جاستاعى چالز ۆاككانىڭ ءولىمى وندىرىستەگى جازاتايىم وقيعا رەتىندە قارالۋدا، دەپ مالىمدەدى موحاۆك وكرۋگىنىڭ بيلىگى.

ۆاككا اريزون شتاتىنداعى اتىس الاڭىندا كىشكەنتاي قىزعا قارۋدى قولدانۋدى ۇيرەتۋدەن ساباق بەرگەن. «ۋزي» تاپانشا-پۋلەمەتىن قولىنا العان قىز نىسانانى كوزدەپ وق اتا باستاعان. الايدا قارۋدىڭ سەرپىنى كۇشتى بولۋى سەبەپتى ءبۇلدىرشىن قارۋعا يە بولا الماي، وق نۇسقاۋشىعا تيەدى. ول لاس-ۆەگاستا اۋرۋحانادا قايتىس بولدى.

اتىس الاڭىنا قىز اتا-اناسىمەن كەلگەن بولاتىن، ولار بولعان قايعىلى جاعدايعا ءوز كوزدەرىمەن كوردى.

كوپتەگەن امەريكالىق شتاتتاردا بالالاردى قارۋ قولدانۋعا جاستايىنان ۇيرەتەدى، الايدا ادەتتە اتىس الاڭىندا قاۋىپسىزدىكتىڭ قاتاڭ قاعيداسى بار، ونى ساقتاعان جاعدايدا، مۇنداي جاعدايلار ورىن الماس ەدى.