باعدات مۋسين 997+ تەلەفون كودى تۋرالى: جىل سوڭىنا دەيىن جاقسى جاڭالىق بولادى

استانا. قازاقپارات - سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين قازاقستاننىڭ تەلەفون كودىن وزگەرتۋ جۇمىستارى تۋرالى ايتتى، دەپ حابارلايدى قازاقپارات ءتىلشىسى.

«7+كودىن رەسەي فەدەراتسياسىمەن جانە وڭتۇستىك وسەتيامەن بولىسەمىز. قازاقستاننىڭ وزىنە تيەسىلى كودى بولۋى كەرەك دەگەن باستامانى مەن كوتەرگەن ەدىم. بۇل ەشقانداي دا گەوساياسي وقيعالارمەن بايلانىستى ەمەس، مەن مۇنى 2020 -جىلى مينيسترلىك باسشىلىعىنا جاڭادان كەلگەنىمدە كوتەرگەنمىن»، - دەدى ب. مۋسين ۇكىمەت كۋلۋارىندا تىلشىلەرگە بەرگەن سۇحباتىندا.

مىسال رەتىندە مينيستر كولىكتى جالپى سەنىمحات بويىنشا ساتۋ ماسەلەسىن ايتتى.

«بۇرىن ءبىز كولىكتى جالپى سەنىمحات بويىنشا ساتاتىنبىز. ءبىزدىڭ 7+ ايماعىندا بولعانىمىز جونىندە قانداي دا ءبىر جالپى سەنىمحات بار. سوندىقتان، حالىقارالىق تەلەكوممۋنيكاتسيا وداعىنىڭ بىزگە جەكە قازاقستاندىق كودتى بەرۋىنە باستاماشى بولدىم. جاقىندا تاعى دا حالىقارالىق تەلەكوممۋنيكاتسيا وداعىنا باردىم، الداعى ۋاقىتتا جاڭالىق جاريالانادى. مەنىڭ قانداي دا ءبىر اقپاراتتى جاريالاۋعا قۇقىعىم جوق، ويتكەنى ءبىز بۇل جۇمىستى جۇرگىزىپ جاتىرمىز. بۇل جۇمىستار اياقتالعان بويدا قازاقستاندى جاقسى جاڭالىقتار كۇتىپ تۇر دەپ ويلايمىن. جىل سوڭىنا دەيىن شەشىم جاريالانادى»، - دەدى باعدات مۋسين.

ەسكە سالا كەتسەك، وتكەن جىلعى قىركۇيەكتە مينيستر قازاقستاندا 997+ دەن باستالاتىن جاڭا تەلەفون كودى بەرىلگەنىن حابارلاعان ەدى.