ەلىمىزدەگى اۋىل شارۋاشىلىعى ماقساتىنداعى جەردىڭ 98,8 پايىزى ۇزاقمەرزىمدى جالداۋدا تۇر - ە. دوسايەۆ
قۇجات ەلباسىنىڭ «100 ناقتى قادام» ۇلت جوسپارىن جۇزەگە اسىرۋعا باعىتتالادى.
ۇلتتىق ەكونوميكا ءمينيسترى ەربولات دوسايەۆتىڭ ايتۋىنشا، زاڭ جوبانىڭ نەگىزگى ماقساتى اۋىل شارۋاشىلىعى ماقساتىنداعى جەرلەردى جەكە مەنشىككە بەرۋ تەتىگىن ەنگىزۋ ارقىلى، ولاردى ءتيىمدى ءارى ۇتىمدى پايدالانۋدى قامتاماسىز ەتۋ بولىپ تابىلادى.
«قازىرگى كۇنى ەلىمىزدەگى اۋىل شارۋاشىلىعى ماقساتىنداعى جەردىڭ 97,4 ميلليون گەكتارى نەمەسە 98,8 پايىزى ۇزاقمەرزىمدى جالداۋدا بولسا، تەك 1,2 پايىزى عانا جەكە مەنشىكتە. سونىڭ سالدارىنان اۋىل شارۋاشىلىعى ماقساتىنداعى جەرلەر نارىقتىق اينالىمعا تارتىلماعان كۇيىندە قالىپ وتىر»، - دەدى مينيستر.
وسىعان بايلانىستى زاڭ جوباسىنىڭ نەگىزگى ماقساتى اۋىل شارۋاشىلىعى ءۇشىن پايدالانىلاتىن جەرلەردى ۇتىمدى جانە ءتيىمدى پايدالانۋدى قامتاماسىز ەتۋ بولىپ تابىلادى. بۇل رەتتە جەرلەردى جەكە مەنشىككە تابىستاۋدىڭ جاڭا تەتىكتەرىن ەنگىزۋ قاراستىرىلادى.
اتاپ ايتقاندا، اۋىل شارۋاشىلىعى ماقساتىندا جەردى ءتيىمدى پايدالانۋ ءۇشىن ونى اۋكسيون ارقىلى جەكە مەنشىككە ساتۋ كوزدەلەدى. بۇل رەتتە مەملەكەت مەنشىگىندەگى اۋىل شارۋاشىلىعى ماقساتىنداعى جەرلەر قازاقستان ازاماتتارى مەن زاڭدى تۇلعالارىنا جەكە مەنشىكتىك قۇقىقپەن اۋكسيون ارقىلى كەزەڭدەر بويىنشا بەرىلمەك.
«بۇل رەتتە، ءبىرىنشى كەزەكتە جەر ۋچاسكەسىنىڭ كاداسترلىق قۇنىن ارتتىرۋدى كوزدەيتىن اۋكسيون ارقىلى ساتىلادى. وسىعان بايلانىستى اعىلشىندىق ادىسپەن بولاتىن ەكى اۋكسيون ارقىلى ۋچاسكە ساتىلماسا، وندا ول ەندى جەر ۋچاسكەسىنىڭ كاداسترلىق قۇنىنىڭ ەلۋ پايىزىنا تومەندەتىلەتىن اۋكسيونعا قويىلاتىن بولادى. بۇل جەردىڭ تولىققاندى نارىقتىق قۇرالعا اينالۋىنا جانە اۋىل شارۋاشىلىعىنىڭ ءوتىمدى اكتيۆى بولۋىنا جول اشادى»، - دەپ ءتۇسىندىردى مينيستر ەربولات دوسايەۆ.
ونىڭ ايتۋىنشا، جالعا بەرىلگەن جەر ۋچاسكەلەرىن ساتىپ الۋ بويىنشا جەڭىلدىك شارتتارى دا قاراستىرىلادى ءارى بۇل نورما بۇگىنگى جالعا الۋشىلاردىڭ مۇددەسىنە ورايلاستىرىلادى. بۇل رەتتە ولارعا بۇدان بۇرىن بەرىلگەن اۋىل شارۋاشىلىعى جەر ۋچاسكەلەرىن پايدالانۋ قۇقىعىنىڭ مەرزىمى اياقتالعانعا دەيىن جەكە مەنشىككە جەردىڭ كاداسترلىق قۇنىنىڭ ەلۋ پايىزى مولشەرىنە دەيىن ايقىندالاتىن جەڭىلدىك باعامەن تولەۋ قاراستىرىلادى. بۇل تولەۋ مەرزىمى كەيىننەن ون جىلعا دەيىن ۇزارتىلۋ قۇقىعى دا كوزدەلەدى.
اۆتور: قانات مامەتقازى ۇلى
