باتىس قازاقستان وبلىسىندا 94 مۇعالىم جەتىسپەيدى
ب ق و اكىمىنىڭ ورىنباسارى باقىتجان نارىمبەتوۆتىڭ وڭىرلىك كوممۋنيكاتسيالار قىزمەتى الاڭىندا وتكەن بريفينگتە ءمالىم ەتكەنىندەي، سونىڭ ىشىندە قازاق مەكتەبىندەگى ورىس ءتىلى مەن ادەبيەتى ءپانى، ماتەماتيكا، باستاۋىش سىنىپ مۇعالىمى جانە تاربيەشى ورىس تىلىندە، پەداگوگ- پسيحولوگ، لوگوپەد، دەفەكتولوگ ماماندىقتارى باسىمدىققا يە.
باقىتجان حابەر ۇلىنىڭ سوزىنە قاراعاندا، ماسەلە وقۋ جۇكتەمەلەرىن ۇلعايتۋ جانە جاس مامانداردى جۇمىسقا تارتۋ ارقىلى شەشىلىپ جاتىر.
اتاپ ايتقاندا، 2023-جىلى جەرگىلىكتى قاراجات ەسەبىنەن ءبىلىم گرانتتارى ءوڭىردىڭ جوعارى ءبىلىمى بار كادرلارعا قاجەتتىلىكتى ەسكەرە وتىرىپ تاعايىندالسا، سونىڭ 22 ءسى - پەداگوگيكالىق ماماندىق.
سونداي-اق بيىل ءبىلىم بەرۋ ۇيىمدارىنىڭ 74 تۇلەگىنە جەرگىلىكتى بيۋجەت قاراجاتى ەسەبىنەن ءبىلىم بەرۋ گرانتتارىن ءبولۋ تۋرالى سەرتيفيكات بەرىلدى: مەديتسينالىق (60)، پەداگوگيكالىق (10)، قالا قۇرىلىسى، قۇرىلىس جۇمىستارى جانە ازاماتتىق قۇرىلىس (4).
2017-جىلدان باستاپ پەداگوگيكالىق ماماندىققا 200 گرانت بەرىلسە، سونىڭ 70 ءى سوڭعى ءۇش جىلدىڭ ۇلەسىنە تيەدى. بۇگىنگى تاڭدا 46 گرانت يەگەرى ءبىلىم سالاسىندا قىزمەت اتقارۋدا.
اكىم ورىنباسارىنىڭ ايتۋىنشا، وبلىستىڭ ءبىلىم بەرۋ ۇيىمدارىندا بارلىعى 15104 پەداگوگ جۇمىس ىستەسە، سونىڭ 12731 ءى نەمەسە 84,2 پايىزى - جوعارى ءبىلىمدى، ونىڭ ىشىندە ماگيستر دارەجەسى بار - 478 نەمەسە 3,16 پايىز.
وبلىس بويىنشا 10245 پەداگوگ (67,8 پايىز) جاڭا فورماتتا اتتەستاتتاۋدان ءوتتى.
«جاڭا وقۋ جىلىندا وبلىستا 376 (ونىڭ ىشىندە 368 مەملەكەتتىك كۇندىزگى، 3 مەملەكەتتىك كەشكى، 5 جەكە) جالپى ءبىلىم بەرەتىن مەكتەپ جۇمىس جاسايدى، وندا 121 مىڭنان استام وقۋشى ءبىلىم الادى. ءبىلىم كۇنى قارساڭىندا 1-سىنىپقا 13 174 وقۋشى قابىلداندى. وتكەن وقۋ جىلىن 5 789 تۇلەك اياقتاسا، سونىڭ 4942 ءسى ۇلتتىق ءبىرىڭعاي تەستىلەۋدەن ءوتتى. 2805 مەكتەپ ءبىتىرۋشى تۇلەك نەمەسە 57 پايىزى مەملەكەتتىك گرانت يەگەرى اتاندى. بۇل كورسەتكىش وتكەن جىلمەن سالىستىرعاندا 9,4 پايىزعا جوعارى» دەدى ب. نارىمبەتوۆ.
