ەلىمىزدىڭ حالىقارالىق رەزەرۆى 94,6 ميلليارد دوللارعا جەتتى

استانا. قازاقپارات - ەلىمىزدىڭ حالىقارالىق رەزەرۆى 94,6 ميلليارد دوللارعا جەتتى. بۇل تۋرالى ۇكىمەت وتىرىسىندا ۇلتتىق بانك ءتوراعاسى عالىمجان ءپىرماتوۆ ايتتى، دەپ حابارلايدى قازاقپارات ءتىلشىسى.

«جالپى حالىقارالىق رەزەرۆتەر مامىر ايىنىڭ سوڭىندا 94,6 ميلليارد دوللاردى قۇرادى. ەركىن كونۆەرتاتسيالاناتىن ۆاليۋتاداعى اكتيۆتەردىڭ ۇلعايۋىنا بايلانىستى ۇلتتىق بانكتىڭ التىن- ۆاليۋتا رەزەرۆتەرى جىل باسىنان باستاپ 1,1 پايىزعا نەمەسە 35,5 ميلليارد دوللارعا دەيىن 0,4 ميلليارد دوللارعا ۇلعايدى»، - دەدى ۇ ب ءتوراعاسى.

ونىڭ دەرەگىنشە، ۇلتتىق قوردىڭ اكتيۆتەرى جىل باسىنان باستاپ الەمدىك يندەكستەردىڭ ءوسۋى ەسەبىنەن 6,1 پايىزعا نەمەسە 59,1 ميلليارد دوللارعا دەيىن 3,4 ميلليارد دوللارعا ارتتى.

«ۇلتتىق قوردان رەسپۋبليكالىق بيۋدجەتكە 1,9 تريلليون تەڭگەگە ترانسفەرتتەر ءبولۋ ءۇشىن جىل باسىنان باستاپ 2,9 ميلليارد دوللارعا ۆاليۋتالىق اكتيۆتەر ساتىلدى. قورعا جىل باسىنان باستاپ تۇسكەن جيىنتىق قاراجات 2,4 تريلليون تەڭگەنى قۇرادى»، - دەدى عالىمجان ءپىرماتوۆ.

ءبىرىڭعاي جيناقتاۋشى زەينەتاقى قورىنىڭ زەينەتاقى اكتيۆتەرى 18,5 تريلليون تەڭگەگە جەتتى.

«ءبىرىڭعاي جيناقتاۋشى زەينەتاقى قورىنىڭ زەينەتاقى اكتيۆتەرى جىل باسىنان 1,2 تريلليون تەڭگەگە نەمەسە 8,3 پايىزعا ۇلعايىپ، مامىر ايىنىڭ سوڭىندا 15,8 تريلليون تەڭگەنى قۇرادى»، - دەدى عالىمجان ءپىرماتوۆ.

ۇلتتىق بانك ءتوراعاسىنىڭ دەرەگىنشە، جىل باسىنان ينۆەستيتسيالىق كىرىس كولەمى - 508,1 ميلليارد تەڭگە، زەينەتاقى جارنالارى - 837,4 ميلليارد تەڭگە، زەينەتاقى تولەمدەرى - 100,9 ميلليارد تەڭگە، مەرزىمىنەن بۇرىن الۋ سوماسى 62,8 ميلليارد تەڭگە بولدى.

«زەينەتاقى اكتيۆتەرىنىڭ پورتفەلىن ءارتاراپتاندىرۋ جانە شەتەلدىك نارىقتاردا ينۆەستيتسيالاۋ ماقساتىندا 2023 -جىلدىڭ باسىنان باستاپ 1,1 ميلليارد دوللار ساتىپ الىندى»، - دەدى ول.

اۆتور:

مارلان جيەمباي