قازاقستاندىقتاردىڭ 92,4 پايىزى ەلباسىنىڭ جەر كودەكسىنىڭ ءبىرقاتار نورمالارىنا موراتوري ەنگىزۋىن تولىق قولدايدى - ساۋالداما ناتيجەسى

استانا. قازاقپارات - قوعامدىق-ساياسي ۇدەرىستەردىڭ ساراپشىلىق-جوبالاۋ بيۋروسى كەشە مەملەكەت باسشىسىنىڭ توراعالىعىمەن اعىمداعى كۇن ءتارتىبىنىڭ كوكەيكەستى ماسەلەلەرى بويىنشا وتكەن كەڭەسكە وراي شۇعىل ساۋالداما جۇرگىزدى.

ناتيجەسىندە سۇراۋ سالىنعان حالىقتىڭ 96,3 پايىزى مەملەكەت باسشىسىنىڭ اعىمداعى كۇن ءتارتىبىنىڭ كوكەيكەستى ماسەلەلەرى بويىنشا ءسوز سويلەگەنىنەن حاباردار بولىپ شىقتى. مۇنان بولەك، قازاقستاندىقتاردىڭ 95,2 پايىزى مەملەكەت باسشىسىنىڭ ەلدىڭ كۇن تارتىبىندەگى ماڭىزدى ماسەلەلەرى بويىنشا مەملەكەتتىك ورگانداردىڭ ءتۇسىندىرۋ جۇمىستارىن جاقسارتۋى جونىندەگى تاپسىرمالارىن دۇرىس جانە ۋاقىتىلى دەسە، 93,7 پايىزى - جەر كودەكسىنىڭ نورمالارى بويىنشا قوسىمشا ءتۇسىندىرۋ جۇرگىزۋدى قاجەت دەپ ەسەپتەيدى. سونىمەن قاتار رەسپوندەنتتەردىڭ 92,4 پايىزى جەر كودەكسىنىڭ ءبىرقاتار نورمالارىنا موراتوري ەنگىزۋدى، 96,3 پايىزى - مەملەكەت باسشىسىنىڭ ۇكىمەت جانىنان كوكەيكەستى ماسەلەلەر بويىنشا بارلىق قاجەتتى اقپاراتتار الۋعا بولاتىن «شۇعىل جەلى» - ءبىرتۇتاس Call-ورتالىق قۇرۋ تۋرالى تاپسىرماسىن تولىق قولدايدى. ال سۇراۋ سالىنعانداردىڭ 95,2 پايىزى «قازاقستانداعى تۇراقتىلىق پەن تاتۋلىقتى نىعايتۋ - ول ءاربىر قازاقستاندىقتىڭ ءىسى» دەگەن پرەزيدەنت ن. ءا. نازاربايەۆتىڭ تەزيسىمەن تولىق كەلىسەتىندىگىن بىلدىرگەن.

ايتا كەتەرلىگى، ساۋالدار تەلەفون سۇحباتى تۇرىندە وتكىزىلدى. جالپى ۇلتتىق تاڭداۋ بويىنشا 1100 ادامعا سۇراۋ سالىندى. تاڭداۋ قاتەلىگى 2,9± پايىزدى قۇرايدى.