نۇر- سۇلتاندا 91 جاستاعى قارت كوروناۆيرۋستان جازىلىپ كەتتى
ۇزاق ەمدەلىپ، قالپىنا كەلگەن سوڭ اجەي اياعىنان تۇرىپ، ۇيىنە قايتتى، دەپ حابارلايدى قالا اكىمدىگىنىڭ رەسمي سايتى.
يرينا حلەبنيكوۆانىڭ تۋىستارى 8 ماۋسىم كۇنى مويىن اۋرۋىنا بايلانىستى ۋچاسكەلىك دارىگەردى شاقىرعان ەدى. الدىمەن ولار اجەيدىڭ وستەوحوندروزى بار دەپ ويلاعان. ءبىراق كوپ ۇزاماي بەزگەگى ۇستاپ، جوتەل قىسىپ، ارتىنشا بۋىندارى اۋىرعان. جەدەل جاردەم بريگاداسى كوروناۆيرۋسقا تالداۋ جاساپ، ول وڭ ناتيجە كورسەتكەن. وسىدان كەيىن يرينا حلەبنيكوۆا شۇعىل تۇردە №3 كوپبەيىندى قالالىق اۋرۋحاناعا جاتقىزىلدى.
«اۋرۋحانادا الىنعان اناليز ناتيجەسى وتە ناشار بولدى. مەن ءوزىم رەانيماتولوگ رەتىندە اجەمنىڭ اعزاسىندا قانداي وزگەرىستەر بولىپ جاتقانىن ءتۇسىندىم. اجەم اۋرۋحانادا ۇزاق ۋاقىت بويى وتتەگى ارقىلى ەمدەلدى. ەگدە جاسىنا بايلانىستى سوزىلمالى اۋرۋلارى دا بولدى»، - دەيدى ناۋقاستىڭ نەمەرەسى ينەسسا حلەبنيكوۆا.
جالپى حيرۋرگيا ءبولىمىنىڭ دارىگەرى ۆيتالي كاليننىڭ ايتۋىنشا، ستاتسيونار دارىگەرلەرى ەگدە جاستاعى ناۋقاستى ەمدەۋ ءۇشىن قولدان كەلگەننىڭ ءبارىن ىستەگەن.
«ەمدەۋ جولىن بەلگىلەۋ ءۇشىن ءتۇرلى سالا ماماندارى جۇمىلدىرىلدى. بىرلەسكەن كۇش- جىگەرىمىزدىڭ ارقاسىندا ماقساتىمىزعا جەتتىك. اجەي ءتىرى، دەنى ساۋ، قازىر ۇيىندە»، — دەپ اتاپ ءوتتى دارىگەر.
ءوز كەزەگىندە اجە بريگادانىڭ فەلدشەرلەرىنەن باستاپ اۋرۋحانا اكىمشىلىگىنە دەيىن اتسالىسقانداردىڭ بارىنە العىسىن ءبىلدىردى. ايتا كەتۋ كەرەك، ستاتسيونار دارىگەرلەرى قالا تۇرعىندارىن جاپپاي ۆاكسيناتسياعا قاتىسۋعا شاقىرادى. بۇل ك ۆ ي- دەن قورعانۋدىڭ جالعىز جانە ءتيىمدى ءادىسى.
