اۋعانستانمەن اراداعى تاۋار اينالىمىنىڭ 90 پايىز قازاقستاندىق ەكسپورتقا تيەسىلى

بۇل تۋرالى ەلوردادا ءوتىپ جاتقان قازاقستان مەن اۋعانستان بيزنەس-فورۋمىندا پرەمەر-ءمينيستردىڭ ورىنباسارى - ساۋدا جانە ينتەگراتسيا ءمينيسترى سەرىك جۇمانعارين ءمالىم ەتتى، دەپ حابارلايدى قازاقپارات ءتىلشىسى.
«قازاقستان اۋعانستاننىڭ تاۋەلسىز، بەيتاراپ، ءبىرتۇتاس، بەيبىت، دەموكراتيالىق جانە گۇلدەنگەن مەملەكەت رەتىندە قالىپتاسۋىن جاقتايتىنىن تاعى دا راستاعىم كەلەدى. ءبىز اۋعانستانمەن قالىپتاسقان ساۋدا-ەكونوميكالىق، كولىك-لوگيستيكالىق جانە ەنەرگەتيكالىق بايلانىستاردى ساقتاۋعا مۇددەلىمىز. قازاقستان مەن اۋعانستان اراسىنداعى تاۋار اينالىمى 2022 -جىلى ءىس جۇزىندە 1 ميلليارد ا ق ش دوللارى (987,9 ميلليون ا ق ش دولل.) بەلگىسىنە جەتىپ، 2021 -جىلعى كورسەتكىشتەردەن ەكى ەسە ارتتى. تاۋار اينالىمىنىڭ 90 پايىز قازاقستاندىق ەكسپورتقا، نەگىزىنەن وڭدەلگەن ونىمگە تيەسىلى»، - دەدى س. جۇمانعارين.
ونىڭ ايتۋىنشا، ەلدەر اراسىنداعى ساۋدا بيىلعى 6 ايدا 343,6 ميلليون ا ق ش دوللارىن قۇرادى، ونىڭ ىشىندە قازاقستان ەكسپورتى 334,5 ميلليون دوللارعا جەتتى.
«قازاقستان ءۇشىن اۋعانستان ۇن ەكسپورتىنىڭ جالپى كولەمىنىڭ 70 پايىزىن قۇرايتىن باسىم ۇن نارىعى سانالادى. قازىرگى كەزدە ءبىز ەكسپورت تاۋارلارىن ءارتاراپتاندىرۋ ءۇردىسىن كورىپ وتىرمىز. ءبىزدىڭ ەسەپتەۋلەرىمىزگە قاراعاندا، قازاقستان اۋعانستانعا ازىق-تۇلىك، مۇناي- حيميا، مەتاللۋرگيا، ماشينا جاساۋ سالالارىنىڭ تاۋارلارى بويىنشا 500 ميلليون ا ق ش دوللارى سوماسىنا جەتكىزۋدىڭ ەكسپورتتىق الەۋەتىنە يە»، - دەدى مينيستر.
ونىڭ سوزىنە قاراعاندا، ەلدەر اراسىنداعى ينۆەستيتسيالىق ىنتىماقتاستىق دامىپ كەلەدى. 2005 -جىلدان باستاپ اۋعانستاننان قازاقستان ەكونوميكاسىنا ينۆەستيتسيالار اعىنىنىڭ جالپى كولەمى شامامەن 11,7 ميلليون ا ق ش دوللارىن قۇرادى. قازاقستاندا جۇمىس ىستەيتىن بىرلەسكەن كاسىپورىنداردىڭ سانى ساۋدا سالاسىندا 52 گە جەتتى.
بۇدان بۇرىن حابارلانعانداي، 1-تامىز كۇنى استاناعا اۋعانستاننىڭ ونەركاسىپ جانە ساۋدا ءمينيسترى نۋريددين ازيزي باستاعان 210 ادامنان تۇراتىن بيزنەس-دەلەگاتسيا كەلدى.