قاراسازدا مۇقاعالي ماقاتايەۆتىڭ 90 جىلدىعىن تويلاۋ باستالدى
زامانىمىزدىڭ زاڭعار اقىنى مۇقاعالي ماقاتايەۆتىڭ 90 جىلدىق مەرەيتويىنا دايىندىققا الماتى وبلىسى وتكەن جىلدان باستاپ كىرىسكەن ەدى.
جالپى مەرەيتويدى وتكىزۋگە جەرگىلىكتى بيۋجەتتەن قوماقتى قارجى ءبولىندى. ايتۋلى شاراعا وراي قۇرىلعان ارنايى جۇمىس توبىن وبلىس اكىمى اماندىق باتالوۆ ءوزى باسقارىپ، ازىرلىكتى قۇرىلىس جانە كوركەيتۋ جۇمىستارىنان باستاعان، ءارى ولاردىڭ ساپالى اتقارىلۋىن نازاردا ۇستادى.
ەڭ الدىمەن اقىننىڭ تۋعان جەرى قاراساز اۋىلى، قاراسازبەن ىرگەلەس ەلدى مەكەن سارىجاز، اۋدان ورتالىعى نارىنقول اۋىلدارى اباتتاندىرىلدى. جولدار جاسالىپ، اۋىز سۋ جۇيەسى جاڭعىرتىلىپ، مادەني نىساندار جوندەلدى، ساياباقتار سالۋ قولعا الىنىپ، ەسكەرتكىش ورناتىلدى.
جالپى مەرەيتويعا الدىن الا دايىندىق بارىسىندا قاراساز اۋىلىنداعى اقىن مۋزەيىنە، مادەنيەت ۇيىنە، ا. بارمانبەك ۇلى اتىنداعى ورتا مەكتەپكە جوندەۋ جۇمىستارى جاسالىپ، نىساندار جاڭا كەيىپكە ەندى.
ەلدى مەكەننىڭ ورتالىق كوشەلەرى، ورتالىق الاڭى اباتتاندىرىلىپ، كوشە شامدارى ورناتىلدى. اۋىز سۋ جۇيەسى «اۋىل - ەل بەسىگى» باعدارلاماسىنىڭ اياسىندا رەسپۋبليكالىق بيۋجەتتەن بولىنگەن 427,1 ميلليون تەڭگەگە قايتا جاڭعىرتۋدان وتكىزىلىپ جاتىر. قاراساز اۋىلىندا ونەر مەكتەبىن سالۋ دا - مەرەيتوي اياسىنداعى ماڭىزدى باستامالاردىڭ ءبىرى. قازىر نىساننىڭ جوبالىق-سمەتالىق قۇجاتتارى ازىرلەنۋدە.
اۋىلعا كىرەبەرىستەگى جاستار ساياباعى اباتتاندىرىلدى. ىرگەلەس سارىجاز اۋىلىندا رايىمبەك باتىر ەسكەرتكىشىنىڭ ماڭى كوركەيتىلىپ، ەسكەرتكىش جانىنداعى سۋ جۇيەسى جوندەۋدەن ءوتتى، اۋىلدىڭ ورتالىق كوشەلەرى كوز سۇيسىنەر كەيىپكە كەلتىرىلدى.
بيىلعى جىلى 3 گەكتار اۋماعى بار مۇقاعالي اتىنداعى جاڭا ساياباقتىڭ قۇرىلىسى باستالدى. قۇنى 374,5 ميلليون تەڭگەلىك جوبادا كونسەرتتىك ساحنا، شاعىن فۋتبول الاڭى، بالالار الاڭى، ۆوركاۋت سپورت الاڭى، اللەيا، دەمالىس ايماعى قاراستىرىلعان. سول سياقتى اۋداندىق اكىمدىك عيماراتىنىڭ جانىنان شاعىن ساياباق سالىنا باستادى.
ال اۋداندىق مادەنيەت ءۇيىنىڭ الدىنداعى سكۆەر جانە ورتالىق ساياباق اباتتاندىرىلدى. وسىنداي ۇلكەن دايىندىق جۇمىستارىنىڭ ناتيجەسىندە كوپشىلىك اسىعا كۇتكەن ءداۋىردىڭ دارا تۇلعاسىنىڭ 90 جىلدىق تويى بۇگىن ءوز شىمىلدىعىن ءتۇردى.
قاراساز مادەنيەت ۇيىندە «مۇقاعالي - عاسىر اقىنى» اتتى عىلىمي-پراكتيكالىق كونفەرەنسيا وتكىزىلىپ، وندا قعا اكادەمياسىنىڭ اكادەميگى بايىنقول قاليەۆ، اكادەميك شەرۋباي قۇرمانباي ۇلى، بەلگىلى قالامگەر، «مۇقاعالي» جۋرنالىنىڭ باس رەداكتورى باتىق ءماجيت، قوعام قايراتكەرى، قالامگەر رىسبەك سارسەمباي ۇلى، ادەبيەت سىنشىسى امانگەلدى كەڭشىلىك ۇلى جانە باسقا دا عالىمدار مەن قالامگەرلەر اقىننىڭ ءومىرى مەن شىعارماشىلىعىنا قاتىستى تىڭ دەرەكتەر مەن تەرەڭ تالداۋلارىن ورتاعا سالدى.
ءبىر اتاپ وتەرلىگى، وسى جيىندا باسپا بەتىن كورگەن «مۇقاعالي ءتىلى سوزدىگى» كىتابى تانىستىرىلدى. بۇل كىتاپتا اقىننىڭ تىلدىك قولدانىسىنداعى سوزدەر مەن ءسوز تىركەستەرىنىڭ بارلىعى قامتىلعان.
ال ەرتەڭگى نەگىزگى شارالارعا مەملەكەتتىك حاتشى قىرىمبەك كوشەربايەۆ، وبلىس اكىمى اماندىق باتالوۆ، مادەنيەت جانە سپورت ءمينيسترى اقتوتى رايىمقۇلوۆا قاتىسادى دەپ كۇتىلۋدە. ولار جۇرتشىلىقپەن بىرگە اقىننىڭ مۋزەيىن ارالاپ، نارىنقولدا مۇقاعاليدىڭ قولادان قۇيىلعان ەڭسەلى ەسكەرتكىشىن اشىپ، اۋىل ازاماتتارىنا جاڭا سالىنعان تۇرعىن ۇيلەردىڭ كىلتىن تاپسىرادى دەپ كوزدەلىپ وتىر. جالپى «مەن 21- عاسىر ۇرپاقتارىنىڭ قۇرداسىمىن. بالكىم، ودان ارىدەگى ۇرپاقتاردىڭ تۋىسىمىن دا…» دەپ بولاشاعىن بولجاپ كەتكەن عاسىر اقىنى مۇقاعاليدىڭ مەرەيتويى اياسىنداعى مادەني ادەبي-تانىمدىق شارالار وبلىستا جىل بويى جالعاسىپ جاتىر. بۇل رەتتە بۇگىنگە دەيىن مۇقاعاليدىڭ سوزىنە جازىلعان اندەردەن «جىرلايدى جۇرەك» انشىلەر بايقاۋى، سۋرەتشىلەردىڭ حالىقارالىق پلەنەرى، اقىننىڭ ورىس تىلىندە جارىق كورگەن «ۆوزۆراشەنيە لاستوچكي» كىتابىنىڭ جانە تۇركى ەلىندە الەمنىڭ 6 تىلىنە اۋدارىلعان جيناعىنىڭ تۇساۋكەسەرى بولدى. سونداي-اق «حانتاڭىرى» تەاترى «اققۋلار ۇيىقتاعاندا» پوەماسىن، ب. ريموۆا اتىنداعى دراما تەاترى «قوش ماحاببات» قويىلىمىن ساحنالاعان بولاتىن.
