مەملەكەتتىك قىزمەتتىڭ 90 پايىزى ەلەكتروندى تۇردە كورسەتىلەدى
بۇل تۋرالى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكبايەۆ استانادا ازيا-تىنىق مۇحيتى ايماعى ەلدەرى سىبايلاس جەمقورلىققا قارسى باستاماسىنىڭ وتىرىسىندا ايتتى.
ءوز سوزىندە اگەنتتىك باسشىسى كاسىبي جانە سىبايلاس جەمقورلىقتان ازات مەملەكەت قالىپتاستىرۋدا قازاقستاننىڭ بىرنەشە ماڭىزدى كەزەڭنەن وتكەنىن اتاپ ءوتتى.
«1995-جىلدىڭ وزىندە ءبىز ت م د ەلدەرى ءۇشىن ۇلگى بولعان سىبايلاس جەمقورلىققا قارسى كۇرەس تۋرالى زاڭدى جانە «سىبايلاس جەمقورلىقپەن كۇرەس» باعدارلاماسىن قابىلدادىق. سول كەزدەرى مەملەكەتتىك قىزمەت تۋرالى زاڭ قابىلدانىپ، اگەنتتىك مارتەبەسىندەگى ۋاكىلەتتى ورگان قۇرىلدى. 2015-2025-جىلدارعا ارنالعان ق ر سىبايلاس جەمقورلىققا قارسى ستراتەگياسى قابىلداندى. ەلىمىزدەگى مەملەكەتتىك باسقارۋدىڭ تەرەڭ ينستيتۋتتسيونالدىق رەفورمالارىنىڭ جول كارتاسىنا اينالعان «100 ناقتى قادام» ۇلت جوسپارىن» ىسكە اسىرۋ دا مەملەكەتتىك قىزمەت جۇيەسىن جانە سىبايلاس جەمقورلىققا قارسى ساياساتىن جاڭعىرتۋعا ەلەۋلى ۇلەس قوستى»، - دەپ اتاپ ءوتتى اليك شپەكبايەۆ.
ونىڭ ايتۋىنشا، قازاقستاندا كاسىبي جانە قارجىلاي ىنتالاندىرىلعان اشىق جانە ەسەپ بەرۋشى مەملەكەتتىك اپپارات قالىپتاستى جانە زاڭنىڭ ۇستەمدىگى مەن قاتاڭ جازالاۋ پرينتسيپتەرىنىڭ ساقتالۋى قامتاماسىز ەتىلدى. مەملەكەتتىك قىزمەتتەردى سيفرلاندىرۋ بويىنشا دا ناقتى جۇمىس جۇرگىزىلىپ كەلەدى.
«قازىرگى ۋاقىتتا كوسەتىلەتىن قىزمەتتىڭ 78پايىزى ەلەكتروندى فورماتتا. جاقىن ەكى جىلدىڭ ىشىندە ونى 90 پايىزعا جەتكىزۋ جوسپارلانۋدا. بۇگىنگى كۇننىڭ وزىندە قازاقستان ب ۇ ۇ ءتيىستى رەيتينگىندە ەلەكتروندى ۇكىمەتتى دامىتۋدىڭ جوعارى دەڭگەيى بار ەلدەردىڭ قاتارىنا كىرىپ تۇر»، - دەيدى اگەنتتىك ءتوراعاسى.
قازاقستان ب ۇ ۇ سىبايلاس جەمقورلىققا قارسى كونۆەنتسياسىن راتيفيكاتسيالاپ، ە ى د ۇ سىبايلاس جەمقورلىققا قارسى ىستانبۇل ءىس-قيمىل جوسپارىنا قوسىلعان. 2025-جىلى قىلمىستىڭ الدىن الۋ مەن قىلمىستىق سوت تورەلىگى جونىندە بۇۇ كونگرەسىن وتكىزۋگە دايىندىق ءجۇرىپ جاتىر.
«مۇنىڭ ءبارى بىزگە ەڭ ۇزدىك حالىقارالىق تاجىريبەلەر مەن قوعامدىق قۇرىلىمداردىڭ ەرەكشەلىكتەرىن ۇتىمدى ۇلەستىرىپ سىبايلاس جەمقورلىققا قارسى كۇرەستە ءوز ۇلگىمىزدى قۇرۋعا مۇمكىندىك بەرەدى»، - دەدى اليك شپەكبايەۆ.
