نۇرسۇلتان نازاربايەۆ 90-جىلداردى ەسكە الدى
شاعىن قۇرامداعى كەزدەسۋ كەزىندە پرەزيدەنتتەر 90-جىلداردى ەسكە الدى، دەپ حابارلايدى قازاقپارات ءتىلشىسى.
«ول ءبىر قيىن-قىستاۋ كەزدەر ەدى. كەڭەس وداعى ىدىراعاننان كەيىنگى جىلدار بارىمىزگە دە وڭاي بولعان جوق. بايلانىستار ءۇزىلدى، ەكونوميكا قۇلدىرادى. سول قيىنشىلىقتارعا قاراماستان، ەڭسەمىزدى تىكتەي الدىق. نەگىزى، بارلىعىمىز ءبىر مەجەدەن باستاعان بولاتىنبىز. ارينە، تابيعات رەسۋرستارىنىڭ دا كومەگى ايتارلىقتاي بولدى. دەگەنمەن، سونىڭ بارلىعىن ءتيىمدى پايدالانۋ دا وڭاي شارۋا ەمەس. ينۆەستيتسياداردى تارتۋ قاجەت جانە تاعىسىن تاعىلار. قازاقستان ونى ىسكە اسىرا ءبىلدى. ءبىزدىڭ قازىرگى جەتىستىكتەرىمىز كوپ ەلدەرگە ۇنايدى. ءبىز دە وزىمىزگە ريزامىز»، - دەپ اتاپ كورسەتتى نازاربايەۆ شاعىن قۇرامدا وتكەن كەزدەسۋدە.
ايتا كەتەيىك، كەزدەسۋ بارىسىندا گەورگي مارگۆەلاشۆيلي قازاقستاننىڭ قولداۋى ءۇشىن گرۋزيا حالقىنىڭ شەكسىز ريزا ەكەندىگىن جەتكىزدى.
«ءبىز سىزدەردىڭ قولداۋىلارىڭىزعا شىن جۇرەكتەن ريزامىز. گرۋزيا حالقى ونى ايقىن سەزىنىپ وتىر ءارى جوعارى باعالايدى. وسى ۋاقىتقا دەيىن كورسەتىپ كەلگەن قولداۋلارىڭىز ءۇشىن مىڭ العىس»، - دەدى مارگۆەلاشۆيلي.
نۇرسۇلتان نازاربايەۆ ءوز كەزەگىندە قازاقستاننىڭ گرۋزيا ەكونوميكاسىنا قارجى سالىپ جاتقان ءىرى ينۆەستور ەكەنىن ەسكە سالىپ، اتالعان ەكونوميكالىق شارالاردىڭ ءالى دە جالعاساتىنىن جەتكىزدى.
