ەكسپوعا قازاقستان پاۆيلونى 90 پايىزعا دايىن
بۇل تۋرالى بۇگىن ق ر ۇكىمەتىندەگى باسپا ءسوز ءماسليحاتىندا ەلىمىزدىڭ ەنەرگەتيكا ءمينيسترى قانات بوزىمبايەۆ ءمالىم ەتتى، دەپ حابارلايدى قازاقپارات.
«قازىردىڭ وزىندە قازاقستان پاۆيلونى 90 پايىزعا دايىن. وزدەرىڭىز دە بىلەتىندەي، ونەرتاپقىشتاردىڭ تۋىندىلارىن تورەشىلەر تاڭداپ الدى. وسى ۋاقىتتا بالاما ەنەرگەتيكا سالالارىنا، جالپى ايتقاندا «جاسىل ەكونوميكاعا» قاتىسى بار 28 تۋىندى ىرىكتەلدى. ونىڭ 11 ءى ماكەت رەتىندە، ال قالعانى ۆيدەو روليك رەتىندە كورسەتىلەتىن بولادى. ماكەتتەر قازىرگى ۋاقىتتا سانكت-پەتەربۋرگتە جاسالىپ جاتىر. مەنىڭ ورىنباسارىم وتكەن اپتادا بارىپ كەلدى، جۇمىس ءتيىستى دەڭگەيدە جۇرگىزىلۋدە. ۆيدەو روليكتەر دە جاسالۋدا. شامامەن 1-2 اپتانىڭ ىشىندە تولىعىمەن دايىن بولادى»، - دەدى بوزىمبايەۆ.
سونىمەن قاتار ول جالپى قازاقستان پاۆيلونىنا بيۋجەتتەن قانشا اقشا جۇمسالعانىن قازىرگى ۋاقىتتا ايتا المايتىندىعىن اتاپ ءوتتى.
«الدىمەن جۇمىستى بىتىرەيىك. ودان كەيىن اشىق تۇردە ايتاتىن بولامىز»، - دەدى مينيستر.
ايتا كەتەيىك، ەكسپو-2017 حالىقارالىق مامانداندىرىلعان كورمەسى 10- ماۋسىمدا باستالىپ، 10- قىركۇيەككە دەيىن سوزىلادى.
كورمەگە 2 ميلليوننان استام ادام كەلەدى دەپ كۇتىلۋدە. ولار كورمەنى كەمىندە ەكى رەت ارالايدى دەپ جوسپارلانعان.
جالپى كورمەنى تاماشالاۋشىلاردىڭ 85 پايىزىن قازاقستان ازاماتتارى، ال قالعان 15 پايىزىن شەتەلدىكتەر قۇرايدى. شەتەلدىكتەردىڭ باسىم بولىگى ت م د ەلدەرىنىڭ جانە قىتايدىڭ ازاماتتارى بولادى دەپ كۇتىلۋدە. قازىرگى ۋاقىتتا 112 مەملەكەت پەن 18 حالىقارالىق ۇيىم ەكسپو كورمەسىنە قاتىساتىندىعىن رەسمي تۇردە راستادى.
