بريتانيادا زەينەتكەرلەر 900 مىڭ تەڭگەگە جۋىق زەينەتاقى الادى
الايدا وسى كىسىلەردىڭ اراسىندا جەلىپ ءجۇرىپ جەر تانىپ، ءتۇرلى مەملەكەتتەرگە بارىپ ساياحاتتاپ، باسقا قىزىعۋشىلىق تاۋىپ، سونىسىن ەرمەك قىلىپ وتىرعان كىسىلەر ساناۋلى عانا عوي. ونى مويىنداۋىمىز كەرەك شىعار؟!
كوپتەگەن ساراپشىلار ۇلى بريتانيانىڭ زەينەتاقى جۇيەسىن ماقتاپ جاتادى.
ۇلى بريتانيادا زەينەتاقىنىڭ ءۇش ءتۇرى بار: مەملەكەتتىك، ەڭبەك جانە جەكە زەينەتاقى. مەملەكەتتىك زەينەتاقى - بۇل جالاقىدان جانە الەۋمەتتىك جاردەماقىلاردان ۇستالىپ، ۇلتتىق ساقتاندىرۋعا اۋدارىلاتىن جارنا ەسەبىنەن تولەنەدى. زەينەتاقىنىڭ ەكىنشى ءتۇرى - ەڭبەك زەينەتاقىسى. ونى جۇمىس بەرۋشى اۋدارىپ وتىرادى جانە قىزمەتكەر جالاقىسىنىڭ 8 پروتسەنتىن قۇرايدى. 5 پروتسەنتىن جۇمىسشىنىڭ ءوزى تولەسە، 3 پروتسەنتىن جۇمىس بەرۋشى تولەيدى.
زەينەتاقىنىڭ ءۇشىنشى ءتۇرى ول - جەكە زەينەتاقى. بۇل جەكە كاسىپكەر نەمەسە فريلانسەر بولىپ ەڭبەك ەتەتىندەرگە ارنالعان. جەكە زەينەتاقى ەڭبەك زەينەتاقىسىنا ۇقساس، ءبىراق جەكە كاسىپكەر جارنانى ءوزى اۋدارىپ وتىرادى.
ۇلى بريتانياداعى زەينەت جاسى ەرلەرگە دە، ايەلدەرگە بىردەي - 66 جاس. ۇلى بريتانيادا ورتا ەسەپپەن ەرلەر 79 جاسقا دەيىن، ايەلدەر 83 جاسقا دەيىن ءومىر سۇرەدى. بۇل وزگە ەلدەرمەن سالىستىرعاندا الدەقايدا جوعارى كورسەتكىش. سوندىقتان الداعى ۋاقىتتا ۇكىمەت زەينەت جاسىن ودان دا جوعارى كوتەرمەكشى.
ءيا، ۇلى بريتانيا حالقى قارتايىپ جاتىر. بۇعان ءبىرىنشى كەزەكتە ءومىر ءسۇرۋ دەڭگەيىنىڭ جوعارى بولۋى جانە بالا تۋۋ سانىنىڭ كەمۋى سەبەپ. سوڭعى حالىق ساناعىنا سايكەس ۇلى بريتانيا حالقىنىڭ 19 پروتسەنتى 65 جاستان اسقان ادامدار ەكەندىگى انىقتالعان.
قازىر زەينەت دەمالىسىنا رەسمي تۇردە 66 جاستا شىعادى. ول كەيىن 67-68، ءتىپتى 70 جاسقا دا جەتۋى مۇمكىن. بۇرىن ايەلدەر بەينەتتىڭ زەينەتىن 60 جاستا كورەتىن. زەينەت جاسىنىڭ وسۋىنە نارازى نازىك جاندىلار ەرەۋىلدەرگە دە شىقتى، سوتتاستى دا ءبىراق جەڭىلىس تاپتى. بۇل ءالى دە حالىقتىڭ اشۋ- ىزاسىن تۋعىزىپ وتىرعان ماسەلە.
مۇندا زەينەتكەرلەر ورتا ەسەپپەن ايىنا ۇلتتىق ۆاليۋتامىزعا شاققاندا 900 مىڭ تەڭگە كولەمىندە الادى. زەينەتاقىسىن ءوزىنىڭ ۇرپاعىنا مۇرا ەتىپ قالدىرۋ مۇمكىندىگى دە بار.
www.24.kz
