قازاقستاندا 900 گە جۋىق بريتاندىق كومپانيا جۇمىس ىستەيدى
اڭگىمە اياسىندا تاراپتار «قاۋىپسىز، ءادىل جانە گۇلدەنگەن الەم قۇرۋ ءۇشىن جاھاندىق سەرىكتەستىكتى نىعايتۋداعى قازاقستاننىڭ تۇجىرىمدامالىق كوزقاراسى» ساياسي ۇندەۋىن العا تارتا وتىرىپ، قازاقستاننىڭ ب ۇ ۇ قاۋىپسىزدىك كەڭەسىندەگى جۇمىسىنىڭ باسىمدىقتارىنا توقتالدى، دەپ حابارلادى ءماجىلىس اپپاراتىنىڭ باسپا ءسوز قىزمەتىنەن.
كەزدەسۋ كەزىندە ايرىقشا كوڭىل اۋدارىلعان تاقىرىپتىڭ ءبىرى - قازاقستان پرەزيدەنتى نۇرسۇلتان نازاربايەۆتىڭ باستامشىلىعىمەن جۇرگىزىلىگەن بيلىك تارماقتارى اراسىندا وكىلەتتىكتەردى قايتا ءبولۋ ماسەلەسى. ەلشى حانىم جاڭا باستامانى قازاقستاننىڭ تۇراقتى دامۋى جولىنداعى ماڭىزدى قادام دەپ باعالاي وتىرىپ، ەلىمىزدە جۇرىگىزىلگەن كونستيتۋتسيالىق رەفورماعا بايلانىستى جىلى لەبىزىن جەتكىزدى.
ءماجىلىس سپيكەرى ەكى ەل اراسىنداعى قارىم-قاتىناسقا ءجىتى كوڭىل بولە كەلىپ، وتكەن جىلى سىرتقى ساۋدا اينالىمىنىڭ 1,2 ميلليارد دوللاردى قۇراعاندىعىن اتاپ ءوتتى.
قازاقستاندا 860 بريتاندىق بيزنەس كومپانيالارى تىركەلگەندىگىن العا تارتقان ن. نىعماتۋلين: «ءبىز جاڭا ەكونوميكالىق ساياسات جانە يندۋستريالىق-يننوۆاتسيالىق دامۋ باعدارلاماسى اياسىندا قازاقستاندا يننوۆاتسيالىق جوبالاردى جۇزەگە اسىرۋ ءۇشىن بريتاندىق كاپيتالدىڭ قاتىسۋىنا مۇددەلىمىز»، - دەدى.
جۇزدەسۋ بارىسىندا استانادا وتەتىن «ەكسپو-2017» حالىقارالىق كورمەسى دە نازاردان تىس قالمادى. وسى رەتتە ءماجىلىس ءتوراعاسى بريتاندىق پاۆيلون قازاقستاندىقتار مەن شەتەلدىك قوناقتاردىڭ ەرەكشە ىقىلاسىنا يە بولاتىنىنا سەنىم ءبىلدىردى. سونىمەن قاتار، تاراپتار زاڭ شىعارۋ جۇمىسىندا پارلامەنتارالىق بايلانىستاردى تەرەڭدەتۋدىڭ ماڭىزدىلىعىنا كوڭىل ءبولىپ، تاجىريبە الماسۋدىڭ ءتۇرلى جولدارىن اتاپ ءوتتى.
