الماتى وبلىسىندا 9 جاسار قىز بالا 10 اي بويى قۇلدىقتا ۇستالىپ كەلگەن

الماتى. قازاقپارات - الماتى وبلىسى ۇزىناعاش اۋىلىندا 9 جاسار قىز بالا 10 اي بويى قۇلدىقتا ۇستالىپ كەلگەن. ماسەلەنىڭ ءمان-جايىن قازاقپارات تىلشىسىنە الماتى وبلىسى وڭتۇستىك وڭىرلىك ءى ءى د باسپا ءسوز قىزمەتىنىڭ وكىلى گۇلنار ماعزۇموۆا ايتىپ بەردى.

ونىڭ ايتۋىنشا، وقيعا ۇزىناعاش ماڭىنداعى جاڭاقۇرىلىس اۋىلىندا بولعان.

كورشىلەر ءبىر ءۇيدىڭ ىشىنەن ۇزدىكسىز جىلاعان بالانىڭ داۋسىن ەستىپ جۇرگەندىگىن ايتتى. كەيىن كوشەگە قاشىپ شىققان گۇلنۇر ەسىمدى 9 جاسار قىز بالا كولدەنەڭ كەزىككەن ادامنان جالىنىپ كومەك سۇرايدى. جانى اشىعان اۋىل تۇرعىنى بالانى بورالدايداعى تۋىسىنىڭ ۇيىنە اپارىپ، ب ا ق وكىلدەرىن شاقىرعان. قازىر الماتى قالالىق ءى ءى د الاتاۋ اۋداندىق ءى ءى ب قىزمەتكەرلەرى اتالعان دەرەك بويىنشا تەرگەۋالدى تەكسەرۋ جۇرگىزۋدە.

«نەگىزى بۇل ۇيدە گۇلنۇر وتكەن جىلدىڭ جەلتوقسانىنان بەرى 10 اي تۇرىپ كەلگەن. قىزدىڭ ءسوزى شىندىق بولۋى دا مۇمكىن. ويتكەنى، ونىڭ ءسوزىن دەنەسىندەگى جاراقاتتارى راستايدى. تەرگەۋشىلەر اۋلاعا كىرگەن كەزدە قورادا ەسكى توسەك تۇرعانىن كورگەن. ۇستىندە ەسكى-قۇسقى كورپە جاتىر. گۇلنۇر دا ءوز سوزىندە جۇقا كورپە جامىلىپ، سۋىقتا مۇزداپ، قورادا قونىپ جۇرگەنىن ايتقان. الايدا، ءىستىڭ ءمان-جايى تەرگەۋالدى تەكسەرۋدەن كەيىن بەلگىلى بولادى»، - دەدى گ. ماعزۇموۆا.

قازىر كۇدىكتى ايەلدەن ەشقايدا كەتپەۋ تۋرالى قولحات الىنعان. ول ءوزىنىڭ ايىبىن مويىنداماي وتىر. ءبىر سوزىندە «قىزدى بازاردان تاۋىپ الدىم» دەسە، ءبىر سوزىندە «قۇربىمنىڭ قىزى» دەپ ايتىپ جاتىر.

ال گۇلنۇر كامەلەتكە تولماعانداردى بەيىمدەۋ ورتالىعىندا سوت-مەديتسينالىق ساراپتامادان وتۋدە. وعان سونداي-اق پسيحولوگيالىق جانە مەديتسينالىق كومەك كورسەتىلىپ جاتىر. قىلمىستىق ءىستىڭ قوزعالۋ-قوزعالماۋى سوت-مەديتسينالىق ساراپتامانىڭ قورىتىندىسىنان كەيىن بەلگىلى بولماق.

اۆتور: گۇلميرا عوسمانالي