اقمولا وبلىسىندا 8 مىڭ گەكتار جەر تەلىمى مەملەكەتكە قايتارىلدى

كوكشەتاۋ. قازاقپارات - جاقسى اۋدانىنىڭ پروكۋراتۋراسى جەر زاڭناماسىنىڭ ساقتالۋىنا تالداۋ جۇرگىزىپ، جەرگىلىكتى فەرمەرلەردىڭ اۋىل شارۋاشىلىعى القاپتارىن پايدالانباۋ دەرەكتەرىن انىقتادى، دەپ حابارلايدى قازاقپارات ءتىلشىسى اقمولا وبلىسى پروكۋراتۋراسىنىڭ باسپا ءسوز قىزمەتىنە سىلتەمە جاساپ.

ۆەدومستۆونىڭ مالىمەتىنشە، تالداۋ قورىتىندىلارى بويىنشا اۋدان اكىمدىگىنە اقمولا وبلىسى بويىنشا جەر رەسۋرستارىن باسقارۋ دەپارتامەنتىنە زاڭ بۇزۋشىلىقتاردى جويۋ تۋرالى ۇسىنىستار ەنگىزىلدى.

«پروكۋراتۋرا اكتىلەرى بويىنشا ۋاكىلەتتى جانە جەرگىلىكتى اتقارۋشى ورگاندار قاجەتتى شارالاردى قابىلدادى جانە وسى جىلى مەملەكەتكە اۋدانى 8 مىڭ گەكتار، كاداسترلىق قۇنى 58 ميلليون تەڭگەدەن اساتىن جايىلىم قايتارىلدى. ول ۇزاق ۋاقىت بويى تىكەلەي نىسانالى ماقساتى بويىنشا پايدالانىلمادى»، - دەدى ۆەدومستۆودان.

پروكۋراتۋرانىڭ باسپا ءسوز قىزمەتىنەن اتاپ وتكەندەي، پايدالانىلمايتىن اۋىل شارۋاشىلىعى القاپتارىن قايتارۋ جۇمىستارى جالعاسىپ جاتىر.

«اۋدان پروكۋراتۋراسىنىڭ شارالارى بويىنشا ۋاكىلەتتى ورگان 4 جەر پايدالانۋشىعا جالپى اۋدانى 5861 گەكتار جەر ۋچاسكەلەرىنە زاڭ بۇزۋشىلىقتاردى جويۋ تۋرالى نۇسقاما تابىس ەتتى. جەر پايدالانۋشىلار زاڭ بۇزۋشىلىقتاردى جويماعان جاعدايدا، ۋچاسكەلەر ماجبۇرلەپ الىپ قويىلادى»، - دەپ تولىقتىردى ۆەدومستۆودان.

ايتا كەتسەك، بۇدان بۇرىن مەملەكەتكە جالپى قۇنى 1,6 ميلليارد تەڭگە بولاتىن ورمان ۋچاسكەسى قايتارىلعانىن جازعان ەدىك.