شەتەلدىكتەر قازاقستاندا 8 ەسىرتكى ءوندىرىسىن ىسكە قوسۋدى جوسپارلاعان

استانا. قازاقپارات – ءى ءى م ەسىرتكى قىلمىسىنا قارسى ءىس-قيمىل دەپارتامەنتى اۋقىمدى ارنايى وپەراتسيا بارىسىندا ينتەرنەت-رەسۋرستاردىڭ كومەگىمەن سينتەتيكالىق ەسىرتكىلەر ءوندىرىسىن جانە ولاردى قازاقستان اۋماعىندا وتكىزۋدى ۇيىمداستىرعان ترانسۇلتتىق قىلمىستىق توپتىڭ قىزمەتىن جويدى، - دەپ حابارلايدى Polisia.kz.

وتكەن جىلدىڭ سوڭىندا الماتى وبلىسىنداعى ۆەدومستۆونىڭ جەدەل قىزمەتكەرلەرى جەدەل شارالار جۇرگىزدى. شارا بارىسىندا ءوڭىر اۋماعىندا ءۇش جاسىرىن زەرتحانادا سينتەتيكالىق ەسىرتكى ءوندىرىسىن ۇيىمداستىرعان سەگىز شەتەلدىك انىقتالىپ، ۇستالدى. ودان ءارى جەدەل-ىزدەستىرۋ ءىس-شارالارى بارىسىندا پوليتسيا قوسىمشا وسى قىلمىستىق توپتى قارجىلاندىرۋعا، سونداي-اق پرەكۋرسورلاردى (ەسىرتكى وندىرۋگە ارنالعان حيميالىق زاتتاردى) جانە زەرتحانالىق جابدىقتاردى شەتەلدەن قازاقستانعا جەتكىزۋگە جاۋاپتى ەكى شەتەلدىكتى، ياعني نەگىزگى ۇيىمداستىرۋشىلاردى انىقتادى.

پرەكۋرسورلاردى جەتكىزۋدى، ساقتاۋدى جانە وتكىزۋدى ۇيىمداستىرعان ۇيىمداستىرۋشىلاردىڭ ءبىرى الماتى قالاسىندا ۇستالدى.

ءتىنتۋ بارىسىندا ول جالعا العان التى قويمادان ەسىرتكى ءوندىرۋ تسيكلىنە ارنالعان سەگىز بىرلىك «رەاكتورلار» دەپ اتالاتىن ارنايى زەرتحانالىق جابدىق جانە 13 توننا پرەكۋرسورلار تاركىلەندى.

وسىلايشا، ەلىمىزدە ەكى توننا سينتەتيكالىق ەسىرتكى وندىرۋگە (بۇل 4 ميلليون ءبىر رەتتىك دوزا) جانە سەگىز ءىرى ەسىرتكى زەرتحاناسىن قۇرۋعا جول بەرىلمەدى.

سونداي-اق سينتەتيكالىق ەسىرتكى وندىرۋگە ارنالعان 30 بىرلىكتەن استام باسقا جابدىق، ونىڭ ىشىندە ۆاكۋۋمدىق سۇزگىلەر، تەرمورەگۋلياتورلار، سورعىلار تاركىلەندى. ءۇش جەكە ءۇي مەن ءۇش اۆتوكولىككە تيىم سالىندى.

تەرگەۋ جالعاسۋدا.