تۇركىستاندىق وقۋشى ا ق ش- تاعى 8 ۋنيۆەرسيتەتتىڭ گرانتىن جەڭىپ الدى
جانەركە زەيلبەكوۆا كەلەس اۋدانى بىرتىلەك اۋىلدىق وكرۋگىندە ورنالاسقان 9№ كولتوعان جالپى ورتا مەكتەبىندە وقيدى.
9-سىنىپتان باستاپ اعىلشىن ءتىلىن مەڭگەرۋگە دەن قويعان. سەمينارلار مەن كۋرستارعا قاتىسىپ، ءبىلىمىن جەتىلدىرۋمەن كەلەدى.
باستى ماقساتى - نازاربايەۆ ۋنيۆەرسيتەتىنە ءتۇسۋ بولاتىن. ول بىلتىر شەتەلدىك ۋنيۆەرسيتەتتەر جاريالاعان ونلاين وليمپيادالار مەن كونكۋرستارعا قاتىسىپ، باعىن سىناپ كورەدى. سونىڭ ناتيجەسىندە ا ق ش- تاعى 8 ۋنيۆەرسيتەتتەن وقۋعا شاقىرتۋ الىپ وتىر.
«جانەركە - وتە زەرەك وقۋشى. قاشىقتىقتان وقۋ فورماتىنا اۋىسقان كەزدە ۋاقىتىن بوسقا وتكىزبەي، اعىلشىن ءتىلى بويىنشا ساباقتارعا قاتىسىپ ءجۇردى. رەپەتيتور جالداپ، ونلاين ءدارىس الدى. مىنەزى سالماقتى، قاراپايىم عانا اۋىلدىڭ قىزى. ەشقانداي گيمنازيا، ليتسەي ەمەس، ءجاي سىنىپتا وقيدى. بوستان، نيۋ-يورك، چيكاگو قالالارىندا ورنالاسقان جوعارى وقۋ ورىندارىنان شاقىرتۋ كەلىپتى. ءبىز اۋىل بولىپ قاتتى قۋانىپ جاتىرمىز»، - دەيدى مەكتەپ ديرەكتورى قالدىگۇل تۇرسىنبەكوۆا.
قازىر جانەركە الداعى ەمتيحاندار مەن سىناقتارعا دايىندالىپ جاتىر. قۇجاتتارىن تۇركيا ۋنيۆەرسيتەتتەرىنىڭ بىرىنە دە وتكىزىپ قويعان. ءبىلىمدى شاكىرت جەتىستىككە جەتۋىنە سەبەپشى بولعان ۇستازدارىنا ءدان ريزا. ال ءوزى كەلەشەكتە دارىگەر بولۋعا تالپىنىپ وتىر.
