قازاقپارات كۇنتىزبەسى: 8- شىلدە
ەستە قالار وقيعالار
1920-جىلى سەمەي ۋەزىنىڭ دولونسكايا ستانتسياسى مەن كانونەرسكوە سەلوسىندا ريەۆوليۋتسياعا قارسى شىققاندار كوتەرىلىس جاسادى. نەگىزىنەن بۇلىكتى بايلار باستادى. ءبىراق ولاردى سوۆەت ساياساتىنا نارازى بولعان ورتا شارۋالاردىڭ ءبىرازى قولدادى.
بۇلىك باستاعاندار «كوممۋنيستەرسىز سوۆەتتەر ءۇشىن!»، «ەركىن ساۋدا ءۇشىن» دەگەن ۇراندار كوتەرگەن.
1994-جىلى اقمولا وبلىسىنىڭ بۋراباي كۋرورت ايماعىندا ابىلاي حان ەسكەرتكىشىنىڭ اشىلۋ سالتاناتى ءوتتى.
2009-جىلى ۇلتتىق بانكتىڭ استاناداعى ورتالىق فيليالىنا «OLYMPIC GAMES 2010»، «ەجەلگى قورعان قازىنالارى. بەرەل قورعانى» سەرياسىنان - «جىرتقىش پەن بۇعى» جانە «جالاۋلى كومبەسى» كوللەكتسيالىق شاقالارى كەلىپ ءتۇستى.
«جالاۋلى كومبەسى» شاقالارى 999/1000 سىنامالى، «proof» ساپالى التىننان جاسالعان، سالماقتارى 0,5 جانە 1,24 گرام. ولاردىڭ ىشىندەگى ۇلكەنىنىڭ قۇنى - 8500 تەڭگە، كىشىسىنىڭ قۇنى - 4500 تەڭگە.
«جىرتقىش پەن بۇعى» شاقاسى دا وسى سىنامادان جاسالعان، قۇنى دا وسىنداي. «OLYMPIC GAMES 2010» شاقاسى 925 سىنامالى كۇمىستەن جاسالعان، سالماعى - 31,1 گرام، ديامەترى - 38,61 م م.
2009-جىلى پاۆلودار وبلىسىنىڭ اقسۋ قالاسىندا سالتاناتتى جاعدايدا قازاقستان عىلىم اكادەمياسىنىڭ تۇڭعىش پرەزيدەنتى قانىش ساتبايەۆقا ەسكەرتكىش اشىلدى. عالىمنىڭ ءمۇسىنى قالانىڭ باس كوشەسىنە ورناتىلدى.
ەسكەرتكىش اۆتورى پاۆلودارلىق ءمۇسىنشى يگور سوبوليەۆ مۇسىندىك پورترەتتە اتاقتى جەرلەسىن بارىنشا شىنايى كورسەتۋگە تىرىسقان.
2010-جىلى الماتىدا ق ر ورتالىق مەملەكەتتىك مۇراعاتىنا رەسمي تۇردە قازاقتىڭ ساياسي قايراتكەرى مۇستافا شوقايدىڭ قولجازبالارى تاپسىرىلدى. قولجازبالاردى تۇركياداعى تۇركسوي حالىقارالىق تۇرىك مادەنيەتى ۇيىمىنىڭ وكىلدەرى تاپقان.
2010-جىلى اقتوبەدەگى لوكوموتيۆ پايدالانۋ دەپوسىندا ماشينيسكە قويىلعان سيمۆولدىق ەسكەرتكىش اشىلدى. جالپى بيىكتىگى ءۇش مەتردەن استام بولاتىن قۇرىلىمدى ەسكەرتكىش ىلعي دا قۇرمەتپەن كيىلەتىن ماشينيستىڭ فورماسىن بەينەلەگەن. ونىڭ قولىنا وزىمەن بىرگە پويىزدا الىپ جۇرەتىن ماشينيستىڭ جەكە زاتتارى مەن ازىق-تۇلىك سالىنعان جول سومكەسى ۇستاتىلعان.
ەسكەرتكىش تەمىر بەتونمەن جاسالىپ، قولامەن قاپتالعان. ەسكەرتكىش ورناتۋ تۋرالى وي اقتوبە لوكوموتيۆتى دەپوسىندا ۇجىمنىڭ، قۇقىق وداعى مەن ارداگەرلەر كەڭەسى مۇشەلەرىنىڭ قاتىسۋىمەن وتكەن ءبىر جيىندا ايتىلعان.
بۇل ەسكەرتكىشتىڭ اقتوبەدە ورنالاسۋى جايدان-جاي ەمەس، ءدال وسى جەردەن تەمىر جول كولىگىنىڭ تاريحى باستالعان دەسەك بولادى.
2011-جىلى ق ر ۇلتتىق بانكى قازاقستان تاۋەلسىزدىگىنىڭ 20 جىلدىعىنا ارنالعان ەسكەرتكىش بانكنوتاسىن شىعاردى. ءتۇسى: نەگىزىنەن كوك-كۇلگىن. الدىڭعى جاعىندا قازاقستان رەسپۋبليكاسىنىڭ مەملەكەتتىك رامىزدەرى، «قازاق ەلى» مونۋمەنتى بەينەلەنگەن. ارتقى جاعىندا قازاقستان رەسپۋبليكاسى پرەزيدەنتىنىڭ رەزيدەنتسياسى - اقوردانىڭ كەسكىنى تۇسىرىلگەن.
2015-جىلى ماگدەبۋرگتە (گەرمانيا) وتكەن II ەۋروپالىق حور ويىندارىندا تۇركسوي جاستاردىڭ كامەرالىق حورى «رۋحاني مۋزىكا» اتالىمى بويىنشا التىن مەدالدى جەڭىپ الدى.
حوردىڭ جەتەكشىسى حورمەيستەر، استانا مەملەكەتتىك فيلارمونياسىنىڭ كامەرالىق حورىنىڭ كوركەمدىك جەتەكشىسى گۇلميرا قۇتتىقاداموۆا.
بايقاۋ بارىسىندا تۇرىك مادەنيەتى حالىقارالىق ۇيىمىنىڭ جاستار حورى موتسارت، انتونيو لوتتي، يۋزەف سۆيدەردىڭ شىعارمالارى مەن ايگىلى قازاق كومپوزيتورى ەركەعالي راحماديەۆتىڭ «حورال» تۋىندىلارىن ورىندادى.
قازاقستاننىڭ تۇركى الەمىنىڭ شىعارماشىلىق ۇجىمىندا «استانا وپەرا» مەن استانا قالاسىنىڭ مەملەكەتتىك فيلارمونياسىنىڭ ارتىستەرى بار. تۇركسوي جاستار حورى ازەربايجان، قازاقستان، قىرعىزستان، تۇركيا، تاتارستان كونسەرۆاتوريالارىنىڭ ستۋدەنتتەرىنەن قۇرىلعان. حوردى قۇرۋ شەشىمى قازان قالاسىندا وتكەن تۇركسويدىڭ مادەنيەت مينيسترلەرىنىڭ تۇراقتى كەڭەسىنىڭ 32- ماجىلىسىندە قابىلداندى.
2017-جىلى 6 جاسار اقتاۋلىق ايانات داۋلەتالينا بولگاريادا وتكەن PrincePrincess of the World حالىقارالىق فەستيۆالىنىڭ گران-پري جۇلدەسىن جەڭىپ الدى. كونكۋرسقا الەمنىڭ 20 ەلىنەن 50 ونەرپاز قاتىسقان بولاتىن.
فەستيۆالمەن قاتار وتكەن Star of the world-2017 بايقاۋىندا ايانات ءبىر ءان ايتىپ، ەكى ءبي بيلەپ، ءۇش التىن مەدال يەلەندى.
