رەكوردتار كىتابىنا ەنگەن 8 جاسار اقتوبەلىك بالاقاي جۇرتتى تامساندىردى

استانا. قازاقپارات - ​اقتوبە قالاسىنىڭ 8 جاسار تۇرعىنى تۋرنيككە 42 رەت تارتىلىپ، قازاقستاننىڭ رەكوردتار كىتابىنا ەندى.

مۇسا تۇرقىمبايەۆ ەندى گيننەستىڭ رەكوردتار كىتابىنا ەنۋگە نيەتتى دەپ حابارلايدى استانا ارناسىنا سىلتەمە جاساعان NUR. KZ.

مۇسا ستريت- ۆوركاۋتپەن 3 جاسىنان اينالىسا باستاپتى. ال ءتورت جاسىندا ەش قينالماستان 50 رەت كەۋدەسىن جەردەن كوتەرىپ، جاتتىعۋ جاساعان. قازىرگى كورسەتكىشى - 1600-دەن اسادى.

بالانىڭ نەگىزگى قىزىعۋشىلىعى - بەلتەمىرگە تارتىلۋ. مۇسا قازىر ەلىمىزدە عانا ەمەس، الەمدەگى ەڭ جاس ۆوركاۋتشى. ەكى قولىمەن جەردى تىرەپ، اياعىن كوتەرىپ ءجۇرۋ، تۋرنيكتە تەپە- تەڭدىكتى ۇستاپ تۇرۋ سەكىلدى جاتتىعۋلاردى ورىنداۋ مۇساعا ەش قيىندىق تۋدىرمايدى ەكەن.

بالاقاي الداعى مامىر ايىندا ەكى الەمدىك رەكوردتى جاڭارتۋعا نيەتتى. تۋرنيككە ەش كەدەرگىسىز 55 رەت جانە، دەنەسىنە 6 كەلىلىك گانتەل بايلاپ، 20 رەت تارتىلۋعا دايىن.

قازىر ونىڭ جاسىنداعى الەم رەكوردى ۋكراينالىق بالاعا تيەسىلى ەكەن.