كولىكتى جوندەۋگە سوت ارقىلى 8 ميلليون تەڭگە ءوندىرىپ الدى
جول اپاتى وسىدان ەكى جىل بۇرىن بولعان. سول كەزدە Hyundai مىنگەن ءبىر كەلىنشەك اۋلادان شىعىپ كەلە جاتقاندا Lexus-پەن سوقتىعىسقان. ول كولىك تىزگىنىندە دە ايەل وتىرعان. قوزعالىس ەرەجەسىنە سايكەس، اۋلادان شىققان كولىك جول بەرۋى ءتيىس.
سەبەبى ەكىنشى كولىك باس جولمەن كەلە جاتقان. استانا قالاسىنىڭ ماماندىرىلعان اۋدانارالىق اكىمشىلىك سوتىندا Hyundai-دىڭ جۇرگىزۋشىسى كىنالى دەپ تانىلعان بولاتىن. ال Lexus-تىڭ يەسىنە ساقتاندىرۋ كومپانياسىنىڭ ەسەبىنەن 1 ميلليون تەڭگە كولەمىندە ماتەريالدىق شىعىن تولەندى.
دەگەنمەن، ول العاشقى سوت شەشىمىمەن كەلىسپەي، ودان كوپ اقشانى تالاپ ەتتى. سەبەبى جەكەمەنشىك باعالاۋ كومپانياسىنىڭ ەسەبىنە سايكەس، Lexus ماركالى كولىكتى جوندەۋگە 10 ميلليون تەڭگەدەن استام اقشا قاجەت.
«استانا قالاسىنىڭ ەسىل اۋداندىق سوتىنىڭ شەشىمىنە سايكەس، زارداپ شەككەن ايەلدىڭ پايداسىنا 8 ميلليون تەڭگەدەن استام ماتەريالدىق شىعىن ءوندىرىلدى. سوت قاۋلىسى زاڭدى كۇشىنە ەندى»، - دەلىنگەن سوتتىڭ رەسمي حابارلاماسىندا.
