تايلاندا جول اپاتىنان 8 قازاقستاندىق زارداپ شەكتى

استانا. قازاقپارات - تايلاندا جول-كولىك وقيعاسىنان قازاقستاننىڭ 8 ازاماتى زارداپ شەكتى، دەپ حابارلايدى قازاقپارات The Nation باسىلىمىنا سىلتەمە جاساپ.

قازاقستاندىق تۋريستەرمەن بىرگە توبەسى اشىق ميكرواۆتوبۋستىڭ جۇرگىزۋشىسى جانە جول كورسەتۋشى جاراقات العان. ساياحاتتاۋشى توپ پحۋكەت ارالىنداعى Hanuman World اتتراكتسيون ساياباعىنا بارا جاتقان.

باسىلىم تاراتقان اقپاراتتارعا قاراعاندا، جۇرگىزۋشى كولىك ءرۋلىن باسقارا الماي، جول شەتىندەگى اعاشقا سوعىلعان.

توعىز جولاۋشى Dibuk Hospital Dibuk Hospital اۋرۋحاناسىنا جەتكىزىلدى. ەكى ءتۋريستىڭ اياعى، بىرەۋىنىڭ قولى سىنعان.

باسىنان قاتتى جاراقات العان تۋريستەردىڭ بىرەۋى جەدەل تۇردە Phuket International Hospital اۋرۋحاناسىنا جىبەرىلدى.

پوليتسيا جول وقيعاسىن تەكسەرىپ جاتىر.