قىزىلوردا وبلىسى يران يسلام رەسپۋبليكاسىمەن 8 مەموراندۋمعا قول قويدى
سىربويىلىق كاسىپكەرلەر گۇلىستان جانە مازانداران پروۆينتسيالارىنداعى اۋىل شارۋاشىلىعى، ءوندىرىس ورىندارىن ارالاپ كورىپ، يراننىڭ بيزنەس قاۋىمداستىعىنا ورتاق جوبالاردى تانىستىردى، دەپ حابارلايدى وبلىستىق اكىمدىكتىڭ باسپا ءسوز قىزمەتى.
قىزىلوردالىق دەلەگاتسيا گۇلىستان پروۆينتسياسىندا اۋىل شارۋاشىلىعى ونىمدەرىن وڭدەۋ، مال شارۋاشىلىعى سالاسىنداعى ءىرى كومپانيالاردىڭ باسشىلارىمەن كەزدەسىپ، پروۆينتسيانىڭ گۋبەرناتورى سەييد مانوف حاشەميمەن بىرلەسكەن جۇمىستار تۋرالى كەلىسسوزدەر وتكىزدى. مۇنان بولەك، «قىزىلوردا وبلىسى مەن گۇلىستان پروۆينتسياسى اراسىنداعى ەكونوميكالىق جانە ينۆەستيتسيالىق بايلانىس» تاقىرىبىندا بيزنەس فورۋم بولىپ ءوتتى.
فورۋم اياسىندا ناقتى جوبالار بويىنشا مەموراندۋمدارعا قول قويىلدى. «ەلباسىنىڭ ي ي ر پرەزيدەنتى حاسان رۋحانيمەن ساياسي كەلىسىمدەرىنىڭ ارقاسىندا وسىنداي ايماقتىق قارىم-قاتىناستاردىڭ نەگىزى قالانعان. بولاشاقتا بۇل ەلمەن ساۋدا-ەكونوميكالىق قاتىناستى ودان ءارى دامىتۋعا مۇمكىندىك بار. ويتكەنى قازاقستاننىڭ، تۇرىكمەنستاننىڭ جانە يراننىڭ بىرىگىپ سالعان «جاڭاوزەن - قىزىلقيا - بەرەكەت - ەترەك - گورگان» تەمىر جولى بار.
اقتاۋ تەڭىز پورتىنىڭ مۇمكىندىكتەرى دە كەڭەيىپ كەلە جاتىر. سوندىقتان ءبىز وسىنى دۇرىس پايدالانىپ، ەكونوميكامىزعا قاجەتتى جوبالاردى ىسكە اسىرۋعا مۇمكىندىك الىپ وتىرمىز. بىزدەر وتكەن جىلى يران كۇرىشىنىڭ سورتىن 70 گەكتار جەرگە ەگىپ، جاقسى ءونىم الدىق. قازىر يران رەسپۋبليكاسى جىلىنا 3 ميلليون توننا كۇرىشتى ەكسپورتتايدى. ال ونىڭ باعاسى ءبىزدىڭ كۇرىشتىڭ باعاسىنان 10 ەسە قىمبات. سوندىقتان بۇل بىزگە وتە ءتيىمدى. قازىر يرانعا قىزىلوردادان كۇرىش جەتكىزۋ تۋرالى كەلىسىمگە كەلدىك، يران تاراپى بىزبەن جۇمىس ىستەۋگە مۇددەلى ەكەندىكتەرىن كورسەتىپ، ءتيىستى كەلىسىمدەرگە قول قويىلدى»، - دەدى وبلىس اكىمى ق. كوشەربايەۆ.
مۇنان باسقا دەلەگاتسيا گورگان قالاسىنىڭ ەسكى شاھارىن ارالاپ، «اققالا» يندۋستريالىق ايماعىنىڭ جۇمىسىمەن تانىسىپ، گۇلىستاندا تۇراتىن قازاق دياسپوراسىمەن كەزدەسۋ وتكىزدى. مازانداران پروۆينتسياسىندا سىربويىلىق دەلەگاتسيا گۋبەرناتور رابيە فاللاح دجەلوۋدورىنىڭ قابىلداۋىندا بولىپ، «گارە بۋرۋن» كووپەراتيۆىنىڭ بەكرە تۇقىمداس بالىقتاردى ءوسىرۋ جانە ۋىلدىرىق شىعارۋ جۇمىستارىن كورىپ، ءسۇت ونىمدەرىن شىعاراتىن «Kale Dairy Company» كومپانياسىنىڭ جۇمىسىمەن تانىستى.
مازانداران پروۆينتسياسىندا دا بيزنەس-فورۋم ۇيىمداستىرىلىپ، ورتاق جوبالار بويىنشا مەموراندۋمدارعا قول قويىلدى. قاراشا ايىندا يراندىق كاسىپكەرلەر «بايقوڭىر» ينۆەستيتسيالىق فورۋمىنا قاتىسۋ ءۇشىن جانە قول قويىلعان مەموراندۋمدار بويىنشا جۇمىستى باستاۋعا ارنايى قىزىلوردا وبلىسىنا كەلەدى. ايتا كەتۋ كەرەك، بيىل يران يسلام رەسپۋبليكاسىنا «تورەم حوشەمي» سورتىنان 60 توننا كۇرىش ەكسپورتتاۋ جوسپارلانۋدا.
2020-جىلعا قاراي يراندىق كۇرىش القاپتارىن 5 مىڭ گەكتارعا دەيىن ۇلعايتىپ، ەكسپورت كولەمىن 8 مىڭ تونناعا جەتكىزۋ كوزدەلىپ وتىر. وسىنداي جۇمىستار جۇگەرى ەگىپ، وڭدەۋگە قاتىستى دا جۇرگىزىلەتىن بولادى.
مۇنان بولەك، «فاراگير ينچەبورون» يراندىق كومپانياسىمەن مالدى ەكسپورتتاۋ تۋرالى كەلىسىم جاسالدى. تامىز ايىندا «كۇشىمبايەۆ اگرو» كووپەراتيۆى يرانعا مالدىڭ العاشقى پارتياسىن جىبەردى - 812 باس مال (26,5 توننا). بىل جىل سوڭىنا دەيىن تاعى 10 مىڭ باس مال جىبەرۋ جوسپارلانىپ وتىر.
سونىمەن قاتار، يراندىق ارىپتەستەرمەن قىزىلوردا قالاسىندا ەت كومبيناتىن جانە جەمىس-جيدەكتەردى ساقتاۋ، جەتكىزۋ ماقساتىندا ساۋدا-لوگيستيكالىق ورتالىق سالۋ كوزدەلۋدە.
