ەلباسى استاناداعى 8-حالىقارالىق «ەۋرازيا» كينوفەستيۆالىنە ءوز قۇتتىقتاۋىن جولدادى
وعان پرەزيدەنت نۇرسۇلتان نازاربايەۆ ءوز قۇتتىقتاۋىن جولدادى. ەلباسى قۇتتىقتاۋىن ق ر مادەنيەت جانە سپورت ءمينيسترى ارىستانبەك مۇحامەدي ۇلى وقىپ بەردى، دەپ حابارلايدى قازاقپارات ءتىلشىسى.
«اتالعان فورۋم - قازاقستاننىڭ مادەني ومىرىندەگى ەلەۋلى وقيعا. ول ورتالىق ازيانىڭ باستى كينوفەستيۆالىنە اينالدى. اشىق ءارى كرەاتيۆتى الاڭدا شىعارماشىلىق يدەيالار مەن تاجىريبە الماسۋعا مۇمكىندىك بار. كينوفەستيۆال وتاندىق كينەماتوگرافيانىڭ دامۋىنا ءوز ۇلەسىن قوسىپ، الەمدە كينونىڭ دەڭگەيىن كوتەرەدى دەپ سەنەمىن»، - دەلىنگەن پرەزيدەنتتىڭ قۇتتىقتاۋ حاتىندا.
وسىدان كەيىن ءسوز العان «وسكار» سىيلىعىنىڭ لاۋرەاتى نيكولاس كەيدج كينونىڭ مادەني كۇشىن ەرەكشە اتاپ ءوتتى. «كينو كوممۋنيكاتسيانىڭ امبەباپ ءتىلى بولىپ سانالادى. ول ارقىلى ءبىز تاريحتى بايانداپ، بۇكىل الەمگە جەتكىزە الامىز. كينو ارقىلى ءبىز بارلىق مادەني كەدەرگىلەردى ەڭسەرىپ، ءبىر- ءبىرىمىزدى تۇسىنە الامىز»، - دەپ اتاپ كورسەتتى كەيدج. ايتا كەتەيىك، «ەۋرازيا» كينوفەستيۆالى سۇلتان- احمەت حودجيكوۆتىڭ «قىز جىبەك» فيلمىمەن اشىلادى. 1972 -جىلى اتالعان تۋىندى قازاق س س ر مەملەكەتتىك سىيلىعىن جەڭىپ العان.
اۆتور: ارمان اسقاروۆ
