ءدىن تاقىرىبى مەكتەپتەردە ەندى 8-سىنىپتان وقىتىلا باستايدى

استانا. قازاقپارات -   ءدىن تاقىرىبى مەكتەپتەردە بۇدان بىلاي 9 ەمەس، 8-سىنىپتان باستاپ وقىتىلا باستايدى. قازىر جاۋاپتى ماماندار باعدارلامانى بەكىتىپ، وقۋلىقتى ازىرلەپ جاتىر ەكەن. بۇل تۋرالى مادەنيەتتەر مەن دىندەردىڭ حالىقارالىق ورتالىعىنىڭ ديرەكتورى مالىمدەدى.

 ايتا كەتەيىك، جوعارى وقۋ ورىندارى مەن مەكتەپتەردە ءدىن ماسەلەلەرىن ءتۇسىندىرۋ جۇمىستارىن جۇرگىزۋ ماسەلەسى قازاقستاننىڭ ءدىن سالاسىنداعى مەملەكەتتىك ساياسات تۇجىرىمداماسىندا قاراستىرىلعان. ال وسىدان ەكى كۇن بۇرىن ەلباسى جارلىعىمەن قازاقستان رەسپۋبليكاسىنىڭ ءدىن سالاسىنداعى مەملەكەتتىك ساياساتىنىڭ 2017-2020 -جىلدارعا ارنالعان تۇجىرىمداماسى بەكىتىلدى.

 ايدار ءابۋوۆ، مادەنيەتتەر مەن دىندەردىڭ حالىقارالىق ورتالىعىنىڭ ديرەكتورى:

 - ءدىن ىستەرى جانە ازاماتتىق قوعام مينيسترلىگىنىڭ باسشىسى جانە ءبىلىم مينيسترلىگى وسى بىرلەسكەن جۇيەدەگى وقۋ باعدارلاماسىنا جاڭادان وقۋلىقتار جازۋ تۋرالى كەلىسىمگە كەلدى. قازىرگى جوسپارىمىز بويىنشا 9-سىنىپتاردا ەمەس، 8-سىنىپتاردا «ءدىن جانە قوعام» دەگەن ءپان ەنگىزىلىپ جاتىر. وقۋ باعدارلاماسى دايىندالدى، ەندى ونىڭ وقۋلىعى ازىرلەنىپ جاتىر.