ارسەن مەن «ارسەنالدىڭ» 8 وكىنىشى
«ارسەنال» - اعىلشىن پرەمەر- ليگاسىنداعى ازۋلى ۇجىمداردىڭ ءبىرى. بيىل دا چەمپيوندىق اتاقتان ءۇمىتىن ۇزە قويعان جوق. الايدا «قارتامىس قۇرلىقتىڭ» باستى دوداسى سانالاتىن چەمپيوندار ليگاسىندا ءساتتى ونەر كورسەتە الماي كەلەدى. الدە 1/8 فينالدا جەرەبە ءساتتى تۇسكەن، ءساتسىز تۇسكەن سوڭعى التى ماۋسىمدا دا شيرەك فينالعا شىعا العان جوق. بۇل ماۋسىمدى دا 1/8 فينالدا اياقتادى.
ارسەن ۆەنگەر ءوز قاتەلىگىن جاسىرىن ۇستايتىن فۋتبول ماماندارىنىڭ قاتارىنان ەمەس. ونى ب ا ق بەتتەرىنە جاريالانعان سۇقباتتارىنان- اق بايقاۋعا بولادى. ءتىپتى، فرانسۋز مامانى كەزىندە كوز قيىعى تۇسكەن ويىنشىلارىن ساتىپ العاندا، بۇگىندە «ارسەنالدان» اسقان كلۋب بولماسى دا انىق سەكىلدى. سەبەبى، كەزىندە ارسەن ۆەنگەر مەن «ارسەنالدىڭ» قازىرگى الەمنىڭ ۇزدىك ويىنشىلارىن ساتىپ الۋعا مۇمكىندىكتەرى بولعان. بىرىندە تاۋەكەلگە بارۋعا تالپىنباسا، بىرىندە كەشىگىپ قالعان. نازارلارىڭىزعا باپكەر مەن كلۋب ساتىپ الۋعا تىرىسقان ويىنشىلار ءتىزىمىن ۇسىنامىز.
كريشتيانۋ رونالدۋ
2014 -جىلى ارسەن ۆەنگەر كەزىندە كريشتيانۋ رونالدۋدى ساتىپ الماعانىنا وكىنەتىنىن اشىق ايتتى.
- بارىنەن بۇرىن كريشتيانۋ رونالدۋمەن كەلىسىمشارتقا قول قويماعانىمىزعا وكىنەمىن. ونىڭ «ارسەنالعا» اۋىسۋىنا جاقىن قالعان ەدى. الايدا ول «مانچەستەر يۋنايتەدتىڭ» ۇسىنىسىن تاڭداپ كەتتى. مەن ءالى كۇنگە دەيىن مۇنى ويلاسام، ءىشىم قان جىلايدى، - دەدى.
زلاتان يبراگيموۆيچ
ارسەن ۆەنگەر مەن «ارسەنال» «مالمەدە» ويناپ جۇرگەندە زلاتان يبراگيموۆيچكە قىزىعۋشىلىق تانىتقان. ءتىپتى، شۆەد شابۋىلشىسى لوندوندىق ۇجىمعا اۋىسۋعا دا جاقىن بولعان. الايدا باس باپكەردىڭ جاساعان ۇسىنىسى مەن كلۋبتىڭ تارتىپتىك ەرەجەسى زلاتانعا ۇناماي قالىپ، كەلىسىم جۇزەگە اسپاي قالعان.
راحيم ستەرلينگ
بۇگىندە «مانچەستەر سيتي» كلۋبىندا ويناپ جۇرگەن راحيم ستەرلينگ تە ءبىر كەزدەرى «ارسەنال» ويىنشىسى بولۋعا شاق قالعان. بۇل تۋرالى ارسەن ۆەنگەر ءبىر سۇقباتىندا ايتا كەتكەن بولاتىن.
- ستەرلينگ «كۋينز پارك رەيندجەرس» كلۋبىندا ويناپ جۇرگەندە ءبىز وعان قىزىعۋشىلىق تانىتتىق. الايدا ول كەزدە كوماندادا ۆينگەرلەر كوپ بولاتىن. وعان ورىن جوق ەدى. ناتيجەسىندە «ليۆەرپۋل» ءبىرىنشى ۇسىنىس جاساپ، ءوز قاتارلارىنا قوسىپ الدى، - دەگەن ەدى.
ديدە دروگبا
2014 -جىلى ارسەن ۆەنگەر ديدە دروگبامەن دە كەلىسىمنىڭ جۇزەگە اسپاعانىن مويىندادى.
- مەن ديدە دروگبامەن دە جۇمىس جاساعىم كەلدى. فرانسيانىڭ ەكىنشى ديۆيزيونىنداعى «لە مان» كلۋبىندا ويناپ جۇرگەندە- اق تالانتتى ويىنشى ەكەنىن بايقاعان ەدىم. الايدا تاۋەكەلگە بارۋدان باس تارتىپ، ۋىستان شىعارىپ الدىق، - دەگەندى.
ليونەل مەسسي
بۇگىندە الەمنىڭ ۇزدىك ويىنشىلارىنىڭ ءبىرى ليونەل مەسسيدى وزگە كلۋبتا ەلەستەتۋ مۇمكىن ەمەستەي. دەسە دە لوندوندىق ۇجىم ارگەنتينالىق ويىنشىعا كىشكەنتايىنان- اق قىزىعۋشىلىق تانىتقان.
- ءبىز «ارسەنالعا» «بارسەلونا» اكادەمياسىنان فابرەگاس، پيكە جانە مەسسيدى الدىرعىمىز كەلدى. الايدا فابرەگاس قانا كەلدى. ولار ول كەزدە كاتالوندىق كلۋبتىڭ جاسوسپىرىمدەر ساپىندا ويناپ جۇرگەن بولاتىن. مەسسي ءوزىن سوندا جايلى سەزىندى. سوندىقتان دا كەلۋگە ەمەۋرىن تانىتپادى. ءبىز دە سوڭىنا دەيىن تالاسىپ باققان جوقپىز، - دەگەن ءبىر سۇقباتىندا ارسەن ۆەنگەر.
رونالدينيۋ
فۋتبول الەمىندەگى اڭىز ويىنشىلاردىڭ ءبىرى رونالدينيۋ دا ءبىر كەزدەرى «ارسەنالعا» اۋىسۋعا شاق قالعان. الايدا ارسەن مەن «ارسەنالدىڭ» بۇل اۋىسىمى اعىلشىن فۋتبول قاۋىمداستىعىنىڭ ەرەجەسىنە بايلانىستى جۇزەگە اسپاي قالىپتى.
- ءبىز رونالدينيۋدى «پ س ج» كلۋبىنا اۋىسپاي تۇرىپ ساتىپ العىمىز كەلگەن. مەن ونىڭ اعاسى، ءارى اگەنتىمەن جولىقتىم. ول كەزدە رونالدينيۋ 20 جاستا بولاتىن. الايدا قاۋىمداستىق ەرەجەسىنە بايلانىستى بۇل ترانسفەر جۇزەگە اسپاي قالدى، - دەدى.
گارەت بەيل
لوندوندىق كلۋبتىڭ گارەت بەيلدى ساتىپ الۋعا زور مۇمكىندىگى بولعان. الايدا ارسەن ۆەنگەر مەن «ارسەنال» ۆاليلىك ويىنشىنى قاجەتسىنبەگەن ەكەن.
- ءبىز گارەت بەيلدى ءوزىمىز العانىمىز جوق. سەبەبى، ول كەزدە ءبىزدىڭ سول جاق قاپتالداعى قورعانىسىمىزدا ەشلي كوۋل مەن گاەل كليشي بار ەدى. بىزگە تاعى دا سول جاق قورعاۋشى قاجەت بولمادى. بۇل ءبىزدىڭ ۇلكەن قاتەلىگىمىز بولدى. ويتكەنى، گارەت بەيل الاڭداعى ءوز ورنىن اۋىستىرعاننان كەيىن ەكىنشى تىنىسى اشىلدى. ناتيجەسىندە ءبىز بارماق تىستەپ قالدىق، - دەدى ءبىر سۇقباتىندا ارسەن ۆەنگەر.
يايا تۋرە
يايا تۋرە دە ءبىر كەزدەرى «ارسەنالدى» سان سوقتىرىپ كەتكەن ويىنشىلاردىڭ ءبىرى. بۇگىندە «مانچەستەر سيتيدىڭ» بەلدى ويىنشىسى لوندوندىق كلۋبتىڭ كەلىسىمشارتىن كۇتۋدەن ەرتە جالىققان.
- مەن ونى كىشكەنتايىنان تانيمىن. ءتىپتى ءبىزدىڭ اكادەميادا ءوستى دەسەك تە بولادى. الايدا ول بىزبەن بىرگە جۇمىس جاساۋعا تىم جاس بولدى. ءبىز وعان ەلدىڭ جاڭا ءتولقۇجاتىن الىپ بەرۋگە دە تىرىستىق. الايدا يايا تۋرە شىدامسىزدىق تانىتىپ، دونەتسكىلىك «مەتاللۋرگكە» اۋىسىپ كەتتى، - دەگەن ارسەن ۆەنگەر.
massaget.kz
