بياتلون: قازاقستان ايەلدەر قۇراماسى الەم چەمپيوناتىندا 8- ورىنعا كوتەرىلدى

استانا. قازاقپارات - نورۆەگيانىڭ حولمەنكوللەن قالاسىندا بياتلوننان ءوتىپ جاتقان الەم چەمپيوناتىندا ايەلدەر اراسىندا ەستافەتالىق جارىس مارەگە جەتتى.

«ەۋروسپورت» تەلەارناسىنان تىكەلەي كورسەتكەنىندەي، الەمنىڭ 23 قۇراماسى قاتىسقان باسەكەدە قازاقستاندىقتار سەگىزىنشى ورىنعا كوتەرىلىپ، ۇزدىك وندىقتىڭ قاتارىنا ىلىكتى. اسىرەسە، ءبىرىنشى جانە ەكىنشى كەزەڭدە گالينا ۆيشنيەۆسكايا مەن داريا ۋسانوۆ مارەگە بەسىنشى بولىپ كەلسە، ودان كەيىن اننا كيستانوۆا قازاقستان قۇراماسىن ءتىپتى ءتورتىنشى ورىنعا شىعاردى.

بۇل رەتتە گ. ۆيشنيەۆسكايا نىسانا كوزدەۋدە بىردە-ءبىر رەت قاتەلەسپەسە، د. ۋسانوۆا قوسىمشا ءبىر، ا. كيستانوۆا ەكى وقتى پايدالاندى. سوڭعى كەزەڭگە ءار قۇراما كوبىنە ءوز مىقتىلارىن قوياتىنى بەلگىلى. سول سەبەپتى ءارى نىسانا كوزدەۋدە ءتورت رەت ءمۇلت كەتكەندىكتەن، الينا رايكوۆا مارەگە سەگىزىنشى بولىپ كەلدى.

ەڭ باستىسى، بۇل جارىس قازاقستاندىقتاردىڭ دا الەمنىڭ كۇشتى قۇرامالارىمەن باسەكەگە تۇسە الاتىندىعىن كورسەتتى.

ەستافەتالىق سىندا نورۆەگيا قۇراماسى جەڭىمپاز اتانسا، فرانسيا ەكىنشى، گەرمانيا ءۇشىنشى ورىندى يەلەندى.

اۆتور: ەلجان ەرالى