سوعىس كەزىندە 8- ناۋرىز مەرەكەسى قالاي تويلاندى؟
Tengrinews.kz ءتىلشىسى وسى ورايدا ۇلى وتان سوعىسىنىڭ ارداگەرىنەن مايداندا ايەلدەر كۇنىنىڭ قالاي اتاپ وتىلگەنىن سۇراپ ءبىلدى.
ارداگەر تامارا ماكسيموۆا 8- ناۋرىزدى العاش رەت 30 جاسىندا تويلاعان. «مەن مايداندا گوسپيتالدا بولدىم. بىزگە جاراقات العاندار تولاسسىز كەلىپ جاتاتىن. مەرەكە تۋرالى مۇلدە ويلامادىق. ەڭ العاش بۇل مەرەكەنى 1955-جىلى قارسى الدىم. ول كەزدە العاش رەت كىر جۋاتىن ماشينا العان ەدىك. ماعان كورشىلەرىم 8- ناۋرىز ەكەنىن ايتىپ، نەلىكتەن كىر جۋىپ جاتقانىمدى سۇرادى. ال مەنىڭ «مەن ەمەس، ماشينا عوي جۋىپ جاتقان»، - دەپ جاۋاپ بەرگەنىم ەسىمدە»، - دەدى ول.
سوعىس باستالعان كەزدە تامارا 17 جاستا بولعان. باسقا بالالار سياقتى ول دا مەكتەپتەن كەيىن اسكەري كومميسارياتقا جازىلۋعا اسىققان. «ءبىز وتە پاتريوت بولدىق. ءتۇرلى سەبەپپەن ىرىكتەۋدەن وتپەگەندەر ءۇشىن بۇل ۇلكەن قايعى بولاتىن»، - دەدى ارداگەر.
ول اسكەري اۋرۋحانادا العاشىندا تىركەۋشى بولىپ جۇمىس ىستەگەن، كەيىن مەيىربيكەلىككە اۋىسقانىن ايتتى. «مايدانداعى ءاربىر ادام حات كۇتەتىن. ەگەر وعان حات كەلسە، ءوزىن بىرەۋدىڭ كۇتىپ وتىرعانىن ءبىلىپ، ۇيىنە ورالۋعا تىرىساتىن. مەن مايداندا ءوز كۇيەۋىمە دە كومەك كورسەتتىم. ول ەكەۋمىزدىڭ حات الماسۋىمىز 1946-جىلى ۇيلەنۋ تويىمەن اياقتالدى».
قازىر 8- ناۋرىزدا تامارا الەكساندروۆناعا كوپتەگەن قۇتتىقتاۋ كەلىپ تۇسەدى. «سوعىستان كەيىنگى جىلدارى ءبىز 8- ناۋرىزدى تويلاپ، قوناق كۇتەتىنبىز. ءبىز داستارحان جايامىز، ەر ادامدار گۇل اكەلەدى»، - دەدى ول.
