قازاقستاندىق گولوۆكين لەمەنى 8- راۋندتا سۇلاتىپ، جەڭىسكە جەتتى - كەسكىن
ورتا سالماقتىڭ ەڭ قاۋىپتى پانچەرلەرى - گولوۆكين مەن لەمە ءبىرىنشى راۋندتا كۇشتەرىن بىردەن سارپ ەتپەي، ءبىرىن- ءبىرى تانۋمەن بولدى.
دەگەنمەن ەكىنشى راۋندتا گولوۆكين تەگەۋرىندى سوققىلاردى جۇمساپ، لەمەنىڭ اۋسەلەسىن بايقاپ كوردى. لەمە قۇلاشتاپ ۇرىپ، ءوزىنىڭ جويقىن مانەرىمەن قازاق بوكسشىسىنا قارسىلىق تانىتىپ كوردى. الايدا گولوۆكين اشىلىپ قالعان لەمەنى اۋىر دجەبتەرمەن ابدەن ساستىردى. بەسىنشى راۋندتا لەمە بۇيىردەن قاتتى سوققى الىپ، نوكداۋنعا ءتۇستى. دەگەنمەن جەكپە- جەكتى جالعاستىرا الدى. التىنشى جانە جەتىنشى راۋندتار گولوۆكيننىڭ باسىمدىعىمەن ءبىر قالىپتى ءوتتى. ال سەگىزىنشى راۋندا ۇلكەن كولەمدە سوققىلار العان كانادالىقتىڭ مۇشكىل ءتۇرىن كورگەن تورەشى جەكپە- جەكتى توقتاتتى.
قازاقستاندىق بوكسشى ءوز مانسابىندا 34- جەڭىسىنە جانە 31-نوكاۋتىنا قول جەتكىزىپ وتىر. ال لەمە بولسا، 3- رەت جەڭىلىس تاپتى.
ەسكە سالا كەتەيىك، گولوۆكين - لەمە كەزدەسۋى 18 - قازان كۇنى نيۋ- يوركتە لىق تولى Madison Square Garden ارەناسىندا وتكەن بولاتىن. بۇل جۇلدىزدى بوكس شوۋىن تاماشالاۋعا ميللياردەر دونالد ترامپ، ايگىلى بوكسشىلار روبەرتو ديۋران، شەين موزلي مەن لەننوكس ليۋيس، رەسەيلىك بىلعارى قولعاپ شەبەرى سەرگەي كوۆاليەۆ، اكتەر مايكل فوكس كەلدى.
قازاقستاندىق بوكسشى وسى جەڭىسى ءۇشىن 2 ميلليون دوللار الادى دەپ حابارلاندى، ونىڭ ۇستىنە اقىلى ترانسلياتسيالار جۇيەسى PPV- دەن تۇسكەن قاراجاتتىڭ ءبىر ۇلەسىن يەمدەنەدى. ال ونىڭ قارسىلاسى 1,5 ميلليون دوللارعا يە بولماق. بۇل گولوۆكيننىڭ ءوز مانسابىنداعى ەڭ جوعارى گونورارى. بۇنىڭ الدىندا كىشى ۆيللي مونروعا قارسى وتكىزگەن كەزدەسۋى ءۇشىن گەننادي 1,5 ميلليون دوللاردى قالتاعا باسقان بولاتىن. ال قارسىلاسى تەك 100 مىڭ دوللاردى ەنشىلەدى.
ايتا كەتەرلىگى، گەنناديي گولوۆكين - PPV- دا جەكپە- جەگى كورسەتىلگەن ت م د- دان شىققان ءۇشىنشى بوكسشى. ەستە بولسا، 2004 - جىلى ۋكرايندىق ۆيتالي كليچكو PPV- دا ەڭ ءبىرىنشى بولىپ شارشى الاڭعا كوتەرىلگەن ەدى. ول دەنني ۆيليامسقا قارسى شىققان- دى. ودان كەيىن قازاقستاننىڭ بوكس مەكتەبىنەن ءتالىم- تاربيە العان ولەگ ماسكايەۆ حاسيم راحمانمەن ايقاسقان بولاتىن. دەگەنمەن، بۇل جەكپە- جەكتەردەگى PPV- كورسەتكىشتەرى تىم از، ياعني 120 مىڭ مەن 60 مىڭ كورەرمەندى عانا جيناي الدى. ۇيىمداستىرۋشىلار ءۇشىن بۇل جايت قۇردىمعا كەتۋمەن تەڭ. ايتپاقشى، مۇنداي جۇيەدە تابىس اكەلگەن ت م د- دىلىق بوكسشى كوستيا سزيۋ بولعانى ەستە. ءبىراق، ونىڭ شارشى الاڭداعى كەزدەسۋى ا ق ش- تا ەمەس، اۆستراليادا PPV- دا كورسەتىلگەن ەدى.
گەننادي گولوۆكين مەن داۆيد لەمە اراسىنداعى جەكپە- جەكتە «مەديسون- سكۆەر- گاردەن» سپورت كەشەنىندە ورتا سالماقتاعى ءتورت بىردەي بەلبەۋ ساراپقا سالىندى. WBC نۇسقاسى بويىنشا ۋاقىتشا چەمپيون، WBA نۇسقاسى بويىنشا سۋپەرچەمپيون جانە IBO نۇسقاسى بويىنشا چەمپيون تيتۋلدارىنا يە گ. گولوۆكين تاعى ءبىر چەمپيوندىق بەلبەۋگە يەلىك ەتتى. بارلىق بەلبەۋلەردى توپتاستىرۋ باستى ارمانى ەكەندىگىن بىرنەشە مارتە ايتقان گ. گولوۆكين، ءوز كوللەكتسياسىن IBF بەلبەۋىمەن تولىقتىردى.
«قازاقپارات» حالىقارالىق اگەنتتىگى گەننادي گولوۆكيندى جارقىن جەڭىسىمەن قۇتتىقتايدى!
اۆتور: قانات مامەتقازى ۇلى
