نۇر-سۇلتان اكىمىنىڭ ءبىلىم گرانتىنا 883 ميلليون تەڭگە ءبولىنۋى مۇمكىن
نۇر-سۇلتان قالاسى ءبىلىم باسقارماسى باسشىسىنىڭ ورىنباسارى ناريمان ەلامانوۆ بيۋجەتتى ناقتىلاۋ كەزىندە وسىنداي ۇسىنىس ايتتى، دەپ حابارلايدى قازاقپارات ءتىلشىسى.
«قازىرگى تاڭدا ءبىلىم باسقارماسىنىڭ بيۋجەتى -149 ميلليارد تەڭگە. وعان قوسىمشا 4,4 ميلليارد تەڭگە بولىنگەن بولاتىن. ءبىز 22,2 ميلليارد تەڭگە قاجەتتىگىن ايتىپ، ءوتىنىم بەردىك. سۇراپ وتىرعان قوسىمشا قاراجاتتىڭ نەگىزگى سوماسى ەڭبەكاقىعا، ديزەل وتىنى مەن كوممۋنالدىق قىزمەت قۇنىنىڭ وسۋىنە بايلانىستى كوممۋنالدىق قىزمەتتەرگە قاجەت. سونداي-اق، بەينەباقىلاۋ كامەرالارىنا، ماتەريالدىق جابدىقتاۋعا قوسىمشا 3 ميلليارد تەڭگە سۇراپ وتىرمىز. تالاي جىلدان بەرى ماتەريالدىق جابدىقتارىمىز جاڭارتىلعان جوق»، - دەدى باسقارما وكىلى.
سونداي-اق، ناريمان ەلامانوۆ ۆەدومستۆوعا باعىنىستى ۇيىمداردىڭ كەڭسە تاۋارلارىن ساتىپ الۋىنا دەپ قوسىمشا 3 ميلليارد تەڭگە سۇرادى. ونىڭ ىشىندە تاماق ونىمدەرىن ساتىپ الۋعا 1,5 ميلليارد تەڭگە، ءدارى- دارمەكتەرگە 100 ميلليون تەڭگە، بالالار جىلىنا ارنالعان شارالار وتكىزۋگە 2 ميلليارد 200 ميلليون تەڭگە قاجەت ەكەنىن ايتتى.
ال قالا اكىمنىڭ 2022-2026-جىلدارعا ارنالعان گرانتىنا 883,8 ميلليون تەڭگە سۇرالىپ وتىر. اتالعان شارادا قالالىق تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ بيۋجەتتى ناقتىلاۋ كەزىندە قوسىمشا 310 ميلليون تەڭگە سۇرادى.
