قازاقستاننان شەتەل ازاماتتارى اسىراپ العان بالالاردىڭ جالپى سانى 8805 كە جەتتى
بۇل تۋرالى «قازاقپاراتتىڭ» رەسمي ساۋالىنا ق ر ب ع م بالالاردىڭ قۇقىقتارىن قورعاۋ كوميتەتى جولداعان جاۋاپتا حابارلاندى.
«ال 2011 -جىلى شەتەل ازاماتتارىنىڭ بالا اسىراپ الۋ ءراسىمىنىڭ مەحانيزمى قاراستىرىلاتىن «نەكە (ەرلى- زايىپتىلىق) جانە وتباسى تۋرالى» ق ر كودەكسى قابىلداندى. كودەكس قابىلدانعاننان كەيىن (شەتەلدىك اگەنتتىكتەردى اككرەديتاتسيالاۋ ارقىلى) ەلىمىزدە بارلىعى 125 بالا اسىراپ الىندى»، - دەپ اتاپ وتىلگەن كوميتەت مالىمەتىندە.
«نەكە (ەرلى- زايىپتىلىق) جانە وتباسى تۋرالى» كودەكس پەن «بالالاردى قورعاۋ جانە بالانى شەتەلدىكتەر اسىراپ الۋعا قاتىستى ىنتىماقتاستىق تۋرالى كونۆەنتسيانى راتيفيكاتسيالاۋ تۋرالى» ق ر زاڭى قابىلدانعانعا دەيىن رەسپۋبليكامىزدا بالا اسىراپ الۋ كۇشى جويىلعان «نەكە جانە وتباسى» زاڭىنىڭ تالاپتارىنا سايكەس جۇزەگە اسىرىلاتىن.
قابىلدانعان كودەكستىڭ تالاپتارىنا سايكەس قازاقستاندىق ازاماتتاردىڭ بالا اسىراپ الۋ پروتسەدۋراسىنىڭ جەڭىلدەتىلۋىمەن بىرگە قازاقستاندىق بالالاردى اسىراپ العىسى كەلەتىن شەتەلدىكتەر ءۇشىن بالا اسىراپ الۋ پروتسەدۋراسى كۇشەيتىلدى.
وسى جىلدىڭ ءساۋىر ايىندا قابىلدانعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بالانىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ق ر زاڭىمەن بالا اسىراپ الۋ جونىندەگى اگەنتتىكتەرگە قويىلاتىن تالاپتار كۇشەيتىلدى.
ەگەر اگەنتتىك ءوزىنىڭ اككرەديتاتسياسىنان ايىرىلعان جاعدايدا قۇزىرلى شەتەلدىك مەملەكەتتىك ورگاندارعا اسىراپ الىنعان بالالار تۋرالى ەسەپتى ۇسىنۋ مىندەتتەرى جۇكتەلەدى، سونداي-اق اسىراپ الىنعان بالالارعا قاتىستى ورىن العان بارلىق قايعىلى وقيعالار، جاعدايلار مەن زورلىق- زومبىلىق تۋرالى دەرەۋ حابارلاۋ قاجەتتىگى مىندەتتەلەدى.
