ازيادان ەۋروپاعا باعىتتالعان جۇكتەردىڭ 85 پايىزى قازاقستان ارقىلى وتەدى

استانا. قازاقپارات - كولىكتىك تاسىمال سالاسىندا قىتايمەن ىنتىماقتاستىقتا قازاقستان ەڭ بەلسەندى ەلدىڭ ءبىرى بولىپ وتىر، دەپ حابارلايدى قازاقپارات.

«كەشە ءبىز وتە جاقسى فاكتىلەردەن حاباردار بولدىق. اسقار مامين مىرزا (قر پرەمەر- ءمينيسترىنىڭ ءبىرىنشى ورىنباسارى) قازاقستان قىتايمەن جۇمىس ىستەپ جاتقان ەڭ بەلسەندى ەلدەردىڭ ءبىرى ەكەنىن ايتتى. قىتايدان ەۋروپاعا جۇك تاسىمالداۋ بويىنشا 17 پروۆينسيامەن كەلىسىمدەر بەكىتىلگەن. ارينە، ءبىز بۇل مۇمكىندىكتەردى پايدالانۋىمىز كەرەك، وسى ورايدا جۇكتەر سكانديناۆياعا جانە وزگە دە ەۋروپا ەلدەرىنە جەتكىزىلۋى ءۇشىن قازاقستانمەن ىنتىماقتاستىقتى نىعايتۋعا ۋاعدالاستىق»، - دەدى ەكسپو-2017 كورمەسىندە وتكەن باسپا ءسوز ءماسليحاتىندا لاتۆيا تەمىر جولى پرەزيدەنتى ەدۆين بەرزينش.

قازاقستان ءاردايىم لاتۆيا تەمىر جولى ءۇشىن سەنىمدى سەرىكتەس بولعانىنا توقتالعان ول، قازىرگى ۋاقىتتا جاھاندىق وزگەرىستەر مەن ترانزيت سالاسى نارىعىنداعى باسەكەلەستىككە بايلانىستى قازاقستاننىڭ ءرولى ارتىپ كەلە جاتقاندىعىن اتاپ ءوتتى.

ەدۆين بەرزينشتىڭ پايىمىنشا، جاقىن ارادا ازيادان ەۋروپاعا باعىتتالعان جۇكتەردىڭ 85 پايىزى قازاقستان ارقىلى ءوتۋى مۇمكىن.

«سوڭعى جىلدارداعى ءۇردىستى نازارعا الا وتىرىپ، قازاقستاندىق تەمىر جولدارمەن ىنتىماقتاستىقتى كەڭەيتۋگە مۇددەلىمىز. بۇل رەتتە قازاقستان قاقپاسىن ازياعا جانە لاتۆيانى ەۋروپاعا جول رەتىندە پايدالانۋ الەۋەتى زور»، - دەدى ول.

اۆتور: رۋسلان عابباسوۆ