وڭتۇستىك حالقىن سولتۇستىككە قونىستاندىرۋ باعدارلاماسىنا 85 ميلليارد تەڭگە ءبولىندى
بۇل تۋرالى بۇگىن استانادا «كورپوراتيۆتىك سەكتوردا ايەلدەردىڭ مۇمكىندىگىن كەڭەيتۋ» اتتى حالىقارالىق فورۋمدا ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ءمالىم ەتتى.
«قازىرگى ۋاقىتتا وڭتۇستىك وڭىرلەردەن سولتۇستىككە قونىستانۋ بويىنشا باعدارلاما قولعا الىندى. العاشقى جۇمىستار باستالىپ تا كەتتى. ەڭ بىرىنشىدەن، ءبىلىم جانە عىلىم مينيسترلىگىنىڭ «سەرپە» باعدارلاماسى اياسىندا سولتۇستىك وبلىستارعا ستۋدەنتتەر كەلۋدە. ءبىزدىڭ باعدارلاما بويىنشا دا بۇل جۇمىس جالعاسىن تابادى. بيىلدىڭ وزىندە بۇل باعدارلاماعا رەسپۋبليكالىق بيۋدجەتتەن 45 ميلليارد تەڭگە، جەرگىلىكتى بيۋدجەتتەردەن - 40 ميلليارد تەڭگە قاراستىرىلعان. ياعني، 85 ميلليارد تەڭگە وسى باعدارلامانى جۇزەگە اسىرۋعا بولىنۋدە»، - دەدى مينيستر.
ايتا كەتەيىك، بۇنىڭ الدىندا حابارلانعانىنداي، وڭتۇستىك وڭىرلەردەن سولتۇستىك وبلىستارعا كوشۋگە نيەتتى ادامداردى ىنتالاندىرۋدىڭ جاڭا باعىتتارى ەنگىزىلدى. بىرىنشىدەن، قونىس اۋدارعانداردىڭ شىعىندارى 35 ا ە ك كولەمىندە وتەلەتىن بولادى، ياعني وتباسىنىڭ ءاربىر مۇشەسىنە 79 مىڭ تەڭگە سوماسىندا بەرىلەدى. سونىمەن قاتار ءبىر جىل بويى كوشىپ بارعان وتباسىنىڭ باسپانانى جالداۋعا جۇمسايتىن شىعىندارى سۋبسيديالانادى. ق ر ۇكىمەتى انىقتاعان وڭىرلەرگە ەرىكتى تۇردە قونىس اۋدارعان تۇلعالارعا مەملەكەتتىك قولداۋ شارالارى قاراستىرىلعان.
جىل سايىن، وڭىرلەر مەن جۇمىس بەرۋشىلەردىڭ ەڭبەك رەسۋرستارىنا سۇرانىسىن ەسكەرە وتىرىپ، ىشكى كوشى-قون كۆوتاسى بەلگىلەنەدى.
اتالعان كوشتى ىنتالاندىرۋ تەتىگى رەتىندە، باستاپقى بەيىمدەلۋ جانە جول مەن جۇك تاسۋ شىعىنىن وتەۋ قۇرالدارىنان تۇراتىن، قازىرگى تاڭداعى الەۋمەتتىك پاكەتتى قولدانۋ جالعاسىن تابادى. وسى جىلى 2,7 مىڭ ازاماتتىڭ قونىس اۋدارۋىنا سۋبسيديا تولەۋ ماقسات ەتىلگەن.
اۆتور: جاسۇلان جولدىبايەۆ
