16:24, 08 - اقپان 2016 | GMT +5
م. ماقاتايەۆتىڭ 85 جىلدىعىنا ارنالعان «پوەزيا، مەنىمەن ەگىز بە ەدىڭ...» ادەبي-سازدى كەشى وتەدى
استانا. قازاقپارات - ەرتەڭ ق ر ۇلتتىق مۋزەيىندە «تاريحي تۇلعالار» اتتى وقۋ- اعارتۋ باعدارلاماسى اياسىندا اقيىق اقىن مۇقاعالي ماقاتايەۆتىڭ 85 جىلدىعىنا ارنالعان «پوەزيا، مەنىمەن ەگىز بە ەدىڭ...» ادەبي-سازدى كەشى وتەدى، دەپ حابارلايدى قازاقستان رەسپۋبليكاسى ۇلتتىق مۋزەيىنىڭ اقپاراتتىق- يميدجدىك قىزمەتى.
كەشتىڭ باستى ماقساتى قازاقتىڭ ماڭدايىنا بىتكەن ۇلى پەرزەنتىنىڭ تۋعان كۇنىن ەسكەرۋسىز قالدىرماۋ جانە سول ارقىلى مۋزەيگە كەلۋشى قوناقتارعا ادەبيەتىمىزدىڭ التىن قورىنا ەنگەن ونەگەگە تولى اقىن ولەڭدەرىن ناسيحاتتاۋ. قانشاما جىلدار وتسە دە ومىرشەڭدىگىن جويماي كەلە جاتقان اقىننىڭ شىعارماشىلىعىن كەز كەلگەن جاستاعى قازاقستاندىق ءسۇيىپ وقيدى. اتالمىش كەشتىڭ ءوتۋى سوعان بۇلتارتپاس دالەل بولماق.
ادەبي-سازدى كەشتە مۋزەيدىڭ جاستار تەاتر ستۋدياسى پوەتيكالىق پرولوگ جاساپ، مۋزەي قىزمەتكەرلەرى اقىننىڭ ولەڭدەرىن ورىندايدى. شاراعا سەرىك تۇرعىنبەكوۆ، اجار ەربولعان سىندى مادەنيەت جانە ونەر قايراتكەرلەرى قاتىسادى.
اۆتور: مارلان جيەمباي
