اتىراۋ وبلىسىندا 81 مۇعالىم جالعان ديپلوممەن جۇمىس ىستەگەن
اتىراۋ وبلىسىنىڭ قوعامدىق كەڭەسىنىڭ وتىرىسىندا سىبايلاس جەمقورلىققا قارسى قوعامدىق باقىلاۋدى كۇشەيتۋ ماسەلەلەرى تالقىلاندى. سىبايلاس جەمقورلىققا قارسى ءىس-قيمىل اگەنتىگىنىڭ وبلىستىق دەپارتامەنتى پريەۆەنسيا باسقارماسىنىڭ باسشىسى جانىبەك قاراجانوۆ كەڭەس مۇشەلەرىنىڭ نازارىن ءبىلىم بەرۋ سالاسىنداعى سىبايلاس جەمقورلىق تاۋەكەلىنە اۋداردى.
«ءبىلىم سالاسىنداعى سىبايلاس جەمقورلىق تاۋەكەلدەرىنە سىرتقى تالداۋ جۇرگىزۋ كەزىندە كوپتەگەن كەمشىلىك انىقتالىپ وتىر. ماسەلەن، مەكتەپتەردە «ءولى جاندار» بار. قىزمەتكەرلەر مەن وقۋشىلار سانى بىردەي مەكتەپتەر ءارتۇرلى قارجىلاندىرىلعان. ءبىر قىزمەتكەر ءبىر مەزگىلدە 4-5 مەكەمەدە جۇمىس ىستەگەن. كەيبىر ءبىلىم بەرۋ مەكەمەلەرىندە باسشىلار وزدەرىنە لاۋازىمدىق جالاقىسىنا ۇستەمەاقى اۋدارىپ وتىرعان. مونيتورينگ ناتيجەسىندە مەكتەپكە دەيىنگى ءبىلىم بەرۋ مەكەمەلەرىندە 51، ورتا مەكتەپتەردە 30 قىزمەتكەردىڭ جالعان ديپلومدى پايدالانعانى انىقتالدى»، - دەپ حابارلادى جانىبەك قاراجانوۆ.
ونىڭ ايتۋىنشا، جوعارىداعى دەرەكتەردى جويۋ ءۇشىن وبلىستىق ءبىلىم باسقارماسىنا 26 ۇسىنىس جولدانعان.
«قىزمەتكەرلەردىڭ كونتينگەنتى بويىنشا دەرەكتەردى اۆتوماتتى تۇردە سالىستىرۋ ءۇشىن ينتەگراتسيانى قامتاماسىز ەتۋ قاجەت. جەرگىلىكتى اتقارۋشى ورگان دەڭگەيىندە بيۋدجەتتىك وتىنىمدەردى قالىپتاستىرۋ، بەكىتۋ پروتسەستەرىن اۆتوماتتاندىرعان ءجون. ءبىلىم بەرۋ مەكەمەلەرىنە كىرۋ، شىعۋ ۋاقىتىن فورماتتى- لوگيستيكالىق باقىلاۋدى بەلگىلەۋ مۇمكىندىگىمەن قىزمەتكەرلەرىنىڭ قاتىسۋىن باقىلاۋ سەكىلدى ۇسىنىستار بار»، - دەپ ءمالىم ەتتى جانىبەك قاراجانوۆ.
ەسكە سالا كەتەلىك، بۇعان دەيىن اتىراۋدا ءبىر مەكتەپتە 40 مۇعالىمنىڭ جۇمىس ورنى بوس تۇرعانىن جازعان بولاتىنبىز.
