ەلباسى جارلىعىنان كەيىن 819 ادام قازاقستان ازاماتتىعىن الادى - فوتو
«وزدەرىڭىز دە بىلەسىزدەر، ەلىمىزدىڭ تاۋەلسىزدىك جىلدارى ىشىندە قازاقستان ازاماتتىعىن الۋعا بەرىلگەن وتىنىشتەر سانى ارتىپ كەلەدى. ءبىز ونداي كىسىلەرگە جاعداي جاساۋىمىز كەرەك. جالپى، تاۋەلسىزدىكتىڭ 25 -جىلدىعى ىشىندە بىزگە 965 مىڭ ادام كەلىپ، ازاماتتىق الدى»، - دەدى وتىرىستى اشقان مەملەكەتتىك حاتشى.
ونىڭ پايىمىنشا، مۇنىڭ بارلىعى دا ەلباسى نۇرسۇلتان نازاربايەۆتىڭ باسشىلىعىمەن قول جەتكىزىلگەن ەلىمىزدىڭ تابىستارىن مويىنداۋدىڭ ايقىن دالەلى بولىپ سانالادى.
«سوندىقتان ءبىز قازاقستاننىڭ جاڭا ازاماتتارىن قارسى الۋعا قۋانىشتىمىز جانە ولار لايىقتى ازاماتتار بولىپ، تاۋەلسىز قازاقستاننىڭ ودان ارى دامۋىنا ءوز ۇلەستەرىن قوساتىنىنا سەنەمىز»، - دەدى گ. ءابدىقالىقوۆا.
سونىمەن جيىن بارىسىندا قازاقستان ازاماتتىعىن الۋ جانە ودان شىعۋ ماسەلەلەرى قارالدى. ناتيجەسىندە، مەملەكەت باسشىسى ءتيىستى جارلىققا قول قويعاننان سوڭ الىس جانە تاياۋ شەت ەلدەردەن كەلگەن ءتۇرلى ۇلتتىڭ 819 وكىلى قازاقستان ازاماتى اتاناتىن بولادى.
كوميسسيا وتىرىسىنىڭ قورىتىندىسى بويىنشا ءتيىستى شەشىمدەر مەن ۇسىنىمدار قابىلداندى.
