ەۋروپاعا تاسىمالداناتىن جۇكتىڭ 80 پايىزى قازاقستان ارقىلى وتەدى - رومان سكليار
بۇل جايىندا پرەمەر- ءمينيستردىڭ ءبىرىنشى ورىنباسارى رومان سكليار قازاق- گەرمان بيزنەس فورۋمىندا ءمالىم ەتتى، دەپ حابارلايدى قازاقپارات ءتىلشىسى.
«قازىرگى گەوساياسي احۋالدى ەسكەرسەك، جاڭا كولىك- لوگيستيكالىق باعىتتاردىڭ ستراتەگيالىق ماڭىزى ارتىپ تۇر. بۇل ءوزارا تاسىمال تىزبەگى مەن وندىرىستەردى سەنىمدى ءارى ءارتاراپتى ەتۋ ءۇشىن قاجەت. قىتاي مەن ورتالىق ازيادان ەۋروپاعا باعىتتالعان تاۋاردىڭ %80 دان استامى قازاقستان ارقىلى تاسىمالدانادى. بۇل تۇرعىدا قۇرلىقتاعى ساۋدا كارتاسىندا ترانسكاسپي حالىقارالىق كولىك مارشرۋتىنىڭ ماڭىزى ارتىپ وتىر. بۇل باعىتپەن تاسىمالدانىپ جاتقان جۇك اينالىمىنىڭ ۇلعايعانى كوڭىل قۋانتادى. بىلتىر جۇك اۋىستىرىپ تيەۋ كولەمى 2 ەسە ءوسىپ، 1,7 ميلليون تونناعا جەتكەن. ال بيىل العاشقى 5 ايدا جۇك اعىنى %64 ارتتى. ورتا ەسەپپەن، بيىل بۇل باعىتتاعى جۇك اينالىمىنىڭ كولەمىن 10 ميلليون تونناعا دەيىن جەتكىزبەكپىز. قازاقستان ءوز تاراپىنان نەمىس جانە ەۋروپالىق ارىپتەستەرىنە پورتتاردىڭ الەۋەتىن بارىنشا پايدالانۋعا مۇمكىندىك ۇسىنۋعا دايىن»، - دەدى رومان سكليار.
ءبىرىنشى ۆيتسە- پرەمەر ەكى ەل اراسنىدا بالاما ەنەرگەتيكا سالاسىنداعى ارىپتەستىكتى دامىتا الاتىنىن اتاپ ءوتتى.
«بالامالى ەنەرگەتيكا مەن جاسىل ەكونوميكا سالاسىنداعى ىنتىماقتاستىقتىڭ الەۋەتى زور. ءبىز 2030 -جىلعا قاراي ەلدىڭ ەنەرگيا بالانسىنداعى جاڭارتىلاتىن كوزدەردىڭ ۇلەسىن %5 دان %15 دەيىن ۇلعايتۋعا نيەتتىمىز. وسى ماقساتتا ءتيىستى ۇلتتىق ستراتەگيا قابىلدانىپ، بالامالى ەنەرگيا كوزدەرىنە كەزەڭ- كەزەڭىمەن كوشۋ كوزدەلىپ وتىر. ەنەرگەتيكالىق تيىمدىلىكتى ارتتىرۋ باعىتىندا دا شارا قابىلداپ جاتىرمىز»، - دەدى ۇكىمەت باسشىسىنىڭ ءبىرىنشى ورىنباسارى.
