جامبىلدا جىل باسىنان بەرى 80 جاس ءوسپىرىم ۇيىنەن قاشقان
ولاردىڭ كوبىسى از ۋاقىت ىشىندە تابىلىپ، ۇيلەرىنە قايتارىلىپ وتىرعان، دەپ حابارلايدى قازاقپارات ءتىلشىسى.
قاشقان بالالاردىڭ ىشىندەگى بەسەۋى الەۋمەتتىك مەكەمەدەگى جاس ءوسپىرىم. قالعان 75 ى وكىنىشكە قاراي، ءوز ۇيلەرىنەن كەتىپ قالعان. مۇنىڭ ىشىندە التاۋىنىڭ پسيحيكالىق اۋىتقۋلارى بولعان.
جامبىل وبلىستىق پوليتسيا دەپارتامەنتى جەرگىلىكتى پوليتسيا قىزمەتى باسقارماسى باستىعىنىڭ مىندەتىن اتقارۋشى، پوليتسيا مايورى ماناس ابدىكارىموۆتىڭ ايتۋىنشا، نەگىزىنەن قىزداردىڭ قاشىپ كەتۋى ءجيى ورىن الادى، ال ۇلداردىڭ كەتۋى سيرەك.
«وكىنىشكە قاراي، ءوز ۇيلەرىنەن قاشاتىن جاسوسپىرىمدەر قاتارى ازايماي تۇر. كەيبىرەۋى ءتىپتى ءبىر ەمەس، بىرنەشە رەت قاشقان. سەبەپتەرىنە كەلەر بولساق، ولاردىڭ قاتارىندا ءۇي شارۋاسىمەن اينالىسقىسى كەلمەي، ساباق وقىعىسى كەلمەي قاشاتىندار دا بار. كەيدە بالالاردى ۇيدەن قاشۋعا اتا- اناسىنىڭ ادەپسىز مىنەز-قۇلىقتارى، الكوگولدىك ىشىمدىك ىشۋلەرى، قول كوتەرۋلەرى سەبەپ بولادى. اداسىپ نەمەسە ۇزاق ۋاقىت ويناپ، ۇرىس ەستىمەۋ ءۇشىن ۇيىنە بارماي جۇرەتىن بالالار دا بار. ال، الەۋمەتتىك مەكەمەلەردەن كەتۋ سەبەپتەرىن بالالار ول جەردىڭ رەجيمىنە ۇيرەنە الماعاندارىمەن تۇسىندىرەدى.
وكىنىشكە قاراي، مۇنداي بالالار الداپ-ارباۋعا، قىلمىستىق ازعىندىق ارەكەتتەرگە ىلەسىپ نەمەسە قىلمىستىڭ قۇربانى بولىپ جاتادى. اتا-انالار الدىمەن وسى جاعىن ەسكەرسە ەكەن»، - دەيدى ماناس ابدىكارىموۆ.
