الماتىلىق قاريا 80 جاسىندا وزىنەن ەكى ەسە كىشى سۇيىكتىسىنەن بالالى بولدى
بۇل تۋرالى "ەكسپرەسس ك" باسىلىمى حابارلايدى.
الماتىنىڭ نەكە اگەنتتىكتەرىنىڭ ءبىرىن باسشىلىق ەتەتىن ولگا كالينينا اگەنتتىككە اي سايىن كەمىندە ەكى- ءۇش ەگدە جاستاعى ازامات پەن كەيۋانا كومەك سۇراپ كەلەتىنىن العا تارتتى. وتباسىن قۇرۋدى قالايتىن ولاردىڭ ەكىنشى جارىنا دەگەن تالاپتارى دا جوعارى ەكەن.
«جىلىنا بىزدە ەكى- ءۇش زەينەتكەر ءوز باقىتىن تابادى. ەگدە جاستاعىلاردىڭ دەنى ازاماتتىق نەكەگە تۇرعاندى قالايدى. بەس جىل بۇرىن 77 جاستاعى ەر ادام 75 جاستاعى ايەلمەن جۇپ قۇرعان بولاتىن. زەينەتكەر 7-8 ايەلدىڭ ىشىنەن ءبىرىن تاڭداپ، ونىمەن كوڭىل جاراستىردى»، - دەيدى ولگا.
كالينينانىڭ ايتۋىنشا، ەگدە جاستاعىلار ءۇشىن باستىسى پىسىقتىق ەمەس، جارىنىڭ سابىرلى ءارى جاقسى مىنەزدى بولۋى.
«ەگدە جاستاعى ادامداردىڭ قوياتىن نەگىزگى تالابى - جاقسى مىنەزدى ايەل تابۋ، ولاردىڭ ءۇي شارۋاسىنا پىسىقتىعى مەن كورىكتىلىگى اسا ماڭىزدى بولماي شىقتى. سونىمەن قاتار، قاريالارىمىز بولاشاق جارىنىڭ ءوز ءۇيى بولعانىنا دا ءمان بەرەدى. ال ءالى دە جۇمىس ىستەپ جۇرگەن ايەل بولسا، ءتىپتى قۋانا تۇسەدى. ارينە 20-30 جاسقا كىشى ايەلى بولعانىن قالايتىندار جوق ەمەس. ولارعا بۇل ويلارى مۇمكىن ەمەستىگىن ءتۇسىندىرىپ وتىرۋعا تۋرا كەلەدى. ال زەينەتكەر اجەلەرگە وليگارحتار ەگدە جاستاعىلارعا كوز سالمايتىنىن ءتۇسىندىرىپ جاتامىز»، - دەيدى اگەنتتىك ديرەكتورى.
ولگا تۋىستارىنىڭ ءبىرى ۇلكەن جاسىنا قاراماستان، بالالى بولعانىن ەسىنە الدى.
«مەنىڭ ءبىر تۋىسىم 80 جاسىندا اكە اتاندى. جارى ودان ەكى ەسە كىشى. وسى ورايدا، جاسى قانشا ۇلكەن بولسا دا ەر ازاماتتاردىڭ جىنىستىق ومىرگە قىزىعۋشىلىعى جوعارى ەكەنىن بايقاۋعا بولادى. دەگەنمەن ەگدە جاستاعىلار جاس قىزعا كوز سالسا دا، مىنەزى قيىن بولسا، قارىم-قاتىناستارى ۇزاققا بارمايدى. ماسەلەن، 65 جاستاعى كليەنتتەرىمنىڭ ءبىرى ءۇش بالانىڭ اناسى اتانىپ وتىرعان 45 جاستاعى ايەلدەن باس تارتقان بولاتىن»، - دەپ ەسكەرتتى ول.
اننا گونچاروۆانىڭ ماتەريالىنان اۋدارىلدى.
