14:29, 28 - شىلدە 2016 | GMT +5
قازاقستاندا ا ي-80 ماركالى بەنزيننىڭ ءوندىرىسى ءالى توقتاتىلعان جوق - ەنەرگەتيكا مينيسترلىگى
استانا. قازاقپارات - قازاقستاندا ا ي-80 ماركالى بەنزيننىڭ ءوندىرىسىن توقتاتۋ تۋرالى شەشىم ءالى قابىلدانعان جوق. بۇل تۋرالى بۇگىن ق ر ەنەرگەتيكا ۆيتسە- ءمينيسترى اسەت ماعاۋوۆ ءمالىم ەتتى.
«ا ي-80 ماركالى بەنزيندى قولدانۋ كولەمى تەحنيكالىق ستاندارتتاردىڭ جوعارىلاۋىنا بايلانىستى تومەندەي بەرەدى. ازىرگە ەشقانداي شەشىم شىعارىلعان جوق، بەنزيننىڭ بۇرىنعى باعاسى - ليترىنە 89 تەڭگە دەڭگەيىندە ساقتالۋدا»، - دەپ اتاپ ءوتتى ول.
ايتا كەتەيىك، اتالعان بەنزين ماركاسىن وتاندىق جانار- جاعارماي قۇيۋ ستانسالارىندا تابۋ قيىن.
ەستە بولسا، بۇنىڭ الدىندا ءبىرقاتار ب ا ق- تا «قازاقستاندا 2016 -جىلدان باستاپ، ا ي-80 ماركالى بەنزيننىڭ ءوندىرىسى توقتاتىلادى» دەگەن اقپارات تاراعان بولاتىن. سەبەبى كەدەندىك وداق ەلدەرى ەۋرو-4 ستاندارتتارىنا كوشەدى دەگەن جوسپار جاسالعان ەدى.
اۆتور: جاسۇلان جولدىبايەۆ
