بەيجىڭدە سايلاۋشىلاردىڭ 80 پايىزدان استامىن ستۋدەنتتەر قۇراپ وتىر - فوتو

بەيجىڭ. قازاقپارات - جەرگىلىكتى ۋاقىتپەن ساعات 17:00 دەگى جاعداي بويىنشا (استانا ۋاقىتىمەن ساعات 15:00) ق ر- نىڭ ق ح ر- داعى ەلشىلىگىنىڭ جانىنداعى №207 -سايلاۋ ۋچاسكەسىندە سايلاۋشىلاردىڭ 78 پايىزدان استامى - 2034 ادامنىڭ ىشىندە 1598 ادام داۋىس بەردى.

بۇل تۋرالى قازاقپاراتقا بەرگەن سۇحباتىندا ۋچاسكەلىك سايلاۋ كوميسسياسىنىڭ ءتوراعاسى ماناربەك قابازيەۆ حابارلادى.

«قىتايدا جۇرگەن قازاقستاندىقتار ءۇشىن كونستيتۋتسيالىق قۇقىعىن ىسكە اسىرۋ ءۇشىن بارلىق جاعدايلار جاسالعان. ءبىزدىڭ ۋچاسكەمىزدەگى سايلاۋشىلاردىڭ 80 پايىزدان استامى - بۇل بەيجىڭ جانە بۇعان جاقىن ورنالاسقان قالالاردا ءبىلىم الىپ جۇرگەن ستۋدەنتتەر. وزدەرىڭىز دە كورىپ تۇرعانداي، ۋچاسكە بارلىق تەحنيكالىق تالاپتارعا سايكەس جابدىقتالعان. تۇسكە دەيىن 500 دەن استام ادام، ال 17:00 دەگى جاعداي بويىنشا 1598 سايلاۋشى داۋىس بەردى»، - دەدى ول.

كوپتەگەن سايلاۋشىلار، ءبىرىنشى كەزەكتە ستۋدەنت بويجەتكەندەر ءبىر-ءبىرىن داۋىس بەرۋ جاشىگى مەن قازاقستاننىڭ مەملەكەتتىك رامىزدەرى - تۋ مەن ەلتاڭبانىڭ قاسىندا سۋرەتكە ءتۇسىردى. №207 -ۋچاسكەدە داۋىس بەرگەن ءۇش قازاقستاندىق ازامات بۇگىن كامەلەتتىك جاسقا تولىپ، ەستەلىك كادەسىيلارىن الدى.