ورالدا قادىر اقىننىڭ 80 جىلدىق مەرەيتويىنا قىتايدىڭ ىلە قازاق اۆتونوميالى وبلىسىنان اقىندار كەلە جاتىر

سالتاناتتى شارالارعا ق ر پرەمەر-ءمينيسترىنىڭ ورىنباسارى بەردىبەك ساپاربايەۆ، ق ر مادەنيەت جانە سپورت ءمينيسترى ارىستانبەك مۇحامەدي ۇلى، اقىننىڭ تۋىستارى، ەلىمىزگە تانىمال اقىن-جازۋشىلار قاتىسپاقشى.
ب ق و مادەنيەت، مۇراعاتتار جانە قۇجاتتاما باسقارماسىنان الىنعان مالىمەتكە قاراعاندا، الدىمەن 27- ماۋسىم كۇنى تاڭەرتەڭ ورال قالاسىندا اقىن ەسكەرتكىشى مەن قادىر مىرزا ءالى اتىنداعى مادەنيەت جانە ونەر ورتالىعى اشىلىپ، ول ادەبي-سازدى باعدارلاماعا ۇلاسادى.
تۇستەن كەيىن اقىن شىعارماشىلىعىنا ارنالعان عىلىمي-تاجىريبەلىك كونفەرەنسيا ءوتىپ، جاستار اراسىندا ۇيىمداستىرىلعان «ولمەس ولەڭ» اتتى رەسپۋبليكالىق جىر ءمۇشايراسى قورىتىندىلانادى. جابىق تۇردە وتكەن جىر بايگەسىنە ەلىمىزدىڭ وبلىس-قالالارىمەن قاتار قىتايدىڭ ىلە قازاق اۆتونوميالى وبلىسىنان بارلىعى 39 ۇمىتكەر قاتىسىپ، باق سىنادى. قازىلار القاسىنىڭ سۇرىپتاۋىنان ءوتىپ، جەڭىمپاز-جۇلدەگەر اتانعان جاس اقىندار ءوز ولەڭدەرىن وقيدى.
وسى كۇنى كەشكىسىن قادىر مىرزا ءالى اتىنداعى ورتالىقتىڭ امفيتەاترىندا قۇرمانعازى اتىنداعى مەملەكەتتىك اكادەميالىق قازاق ۇلت اسپاپتار وركەسترى كونسەرت قويادى.
مەرەيتويلىق شارالار 28- ماۋسىم كۇنى اقىننىڭ تۋعان جەرى سىرىم اۋدانىندا جالعاسادى. جىمپيتى اۋىلى ورتالىعىنداعى الاڭدا قادىردىڭ ەسكەرتكىشى اشىلىپ، سىرىم دات ۇلى اتىنداعى تاريحي-ولكەتانۋ مۋزەيىندە اقىننىڭ ءومىرى مەن شىعارماشىلىعىنان سىر شەرتەتىن كورمە كوپشىلىك نازارىنا ۇسىنىلماق. اۋداندىق مادەنيەت ۇيىندە اقىننىڭ 80 جىلدىعىنا ارنالعان كونسەرت قويىلادى. ءتۇرلى سپورتتىق جارىستار دا ۇيىمداستىرىلىپ وتىر.