ءبىلىم ءمينيسترى 800 مەكتەپ سالۋدا قانداي مەحانيزم قولدانىلاتىندىعىن ايتتى
«ماڭىزدى باعىتتاردىڭ ءبىرى - ينفراقۇرىلىمدى دامىتۋ. قازىرگى ۋاقىتتا ەلىمىزدە 34 اپاتتى جانە 137 ءۇش اۋىسىمدى مەكتەپ جۇمىس ىستەيدى. 2025 -جىلعا قاراي ورىن تاپشىلىعى 670 مىڭ ورىنعا جەتەدى دەپ بولجاپ وتىرمىز. بۇل ماسەلەنى شەشۋ ءۇشىن 800 جاڭا مەكتەپ سالىنادى. تەك قانا وسى جىلدىڭ سوڭىنا دەيىن 200 جاڭا مەكتەپتى پايدالانۋعا بەرۋ قاجەت. ايماقتار ءتيىستى جوسپارمەن قامتاماسىز ەتىلدى. بۇگىنگى كۇنى جۇمىس قارقىندى ءجۇرىپ جاتىر»، - دەدى مينيستر.
ونىڭ اتاپ وتۋىنشە، جەكەمەنشىك مەكتەپ جەلىسىن ارتتىرۋ وتە ماڭىزدى. سوڭعى ەكى جىلدا ەلىمىزدە 41 مىڭ وقۋشىعا ارنالعان 126 جەكەمەنشىك مەكتەپ اشىلدى.
«بۇل بۇعان دەيىن اشىلعان جەكەمەنشىك مەكتەپتەردىڭ سانىنان 2 ەسە كوپ ەكەنىن اتاپ وتكىم كەلەدى. قازىرگى ۋاقىتتا مينيسترلىك اكىمدىكتەرمەن بىرلەسىپ، 800 مەكتەپتى سالۋ جول كارتالارىن جاساۋدا. ول ءۇشىن 4 مەحانيزم قولدانىلادى: مەملەكەتتىك- جەكەشەلىك ارىپتەستىك، جەكەمەنشىك مەكتەپتەر جەلىسىن دامىتۋ، مەملەكەتتىك بيۋدجەتتەن نىسانالى قۇرىلىس جانە مودۋلدىك كونسترۋكسيالاردان مەكتەپتەر سالۋ»، - دەدى اسحات ايماعامبەتوۆ.
اۆتور: مارلان جيەمباي
