15:34, 13 - اقپان 2016 | GMT +5
قازاقستاندا 800 ادام شوشقا تۇماۋىن جۇقتىردى
استانا. قازاقپارات - قازاقستاندا 800 ادام شوشقا تۇماۋىن جۇقتىردى. بۇل جايىندا قازاقپارات اگەنتتىگىنىڭ رەسمي ساۋالىنا جاۋاپ بەرگەن ق ر ۇلتتىق ەكونوميكا مينيسترلىگى جانىنداعى تۇتىنۋشىلار قۇقىعىن قورعاۋ كوميتەتى ءتوراعاسىنىڭ ورىنباسارى - باس مەملەكەتتىك سانيتارلىق دارىگەر جانداربەك بەكشين ءمالىم ەتتى.
«ەپيدەميولوگيالىق ماۋسىم (2015-جىلدىڭ 1- قازانى) باستالعان ۋاقىتتان بەرى جوعارى تىنىس جولدارىنىڭ جۇقپالى دەرتى (ورۆي) 350 مىڭنان استام رەت تىركەلدى. ونىڭ ىشىندە 911 ءى زەرتحانا ارقىلى تۇماۋ ەكەندىگى، ال ونىڭ 800 ءى نەمەسە 87,3 پايىزى А(H1N1) شوشقا تۇماۋى ەكەندىگى دالەلدەندى. اۋرۋعا شالدىققانداردىڭ باسىم بولىگى 14 جاستاعى بالالار جانە ولار جالپى اۋىرعانداردىڭ 70 پايىزىن قۇرايدى»، - دەدى ج. بەكشين.
2010-جىلدىڭ تامىزىندا دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى А(H1N1) ۆيرۋسىنىڭ 6- فازاسىنىڭ اياقتالعانىن جاريا ەتكەن بولاتىن. وسى ۋاقىتتان بەرى بۇل تۇماۋدىڭ ۆيرۋسى А/H1N1-09 دەپ اتالادى جانە ماۋسىمدىق تۇماۋدىڭ ءبىر تۇرىنە جاتقىزىلعان.
اۆتور: مارلان جيەمباي
